Shillong, Jan 14: BJP dol Padotni seoke watatgipa mande Ernest Mawrie-ni damgni District Council-o aro niamgri koila cho•e uko palatanio togie cha•bokani aro tangka paisao kakketgijanian gapa ine Sorkari-ko chalaienggiparangko tangka paisao tik ong•jaenga ine BJP dolni skotong Pa JP Nadda-ko Delhio gronge apoti ka•anina cha•bokani ba tangka paisako nosto ka•ani dongmanchaenga ine aganode sakki gnang mesokchina ine NPP-ni dilgipa aro Cabinet minister Pa James K Sangma ra•bee aganaha.
“Darangan chanchiatangko parakna bil donga aro ia democracy-ni a•songo je jakoba dosi on•e jaksi otna man•aia. BJP dol uamangni dilgipakoba gronge India sorkarina uamangni chanchianiko parakchina indiba sakkiko mesokna man•a nanggen” ine Pa James krenge aganchakskaaha.
“Da•alo chinga BJP dol baksan bakrime sorkariko rikenga aro maiba chu•onggijani ba kranikgijani dongode uamang sing•grikna ba agan golpogriknan man•aiachim. Indiba potchipe gisiko nabaana kattarangko jokataiania dilgipa ong•e dai ra•gija gita dakpilaha” ine Pa Sangma suk ong•gijaniko parakaha.
