Guwahati, Feb 19: A·songni skotong songjinma Delhi-o da·omiting game-ge·e cha·giparangni jingjengatanirangko nikangkuna gita man·engani gisepon, ma·mongni Agricultural minister Pa Narendra Tomar, da·al salni bako Guwahati songjinmao Assam-ni Department of Agriculture-chi ong·atanggipa programo a·dokni game-ge·e cha·giparangna Chief Minister’s Samagra Gramya Unnayan Yojana (CMSGUY)ni ning·o gama-ge·anio jakkalani kolrangko suale on·angaha.
Programo, Assam-ni Agriculture minister Pa Atul Bora, Rajya Sabha-ni MP Pa Kamakhya Prasad Tasa aro Assam-ni Agriculture Department-ni gipin a·gipi officialrang gimikan dongpae bak ra·angtokaha.
Tom·ao aganprakengon, songrango pilakkon chu·onge man·na amachisa a·songni Prime minister Pa Narendra Modi-ni Atmanirbhar Bharat ba a·songon chu·onga gita pilakko man·na amanina nikjumanganiko chu·sokatna amgen ine Pa Tomar parakataha.
An·tangtangon chu·onge donggipa songrangko ong·atna gitade songni-nokni game-ge·e cha·giparangna gisik on·bataniko nangenga ine aganengon, a·songni bang·batan bang·pagija a·arangko gamgiparang aro dongkalgipa gamgiparangsan ong·bata ine aganangan baksa, man·gimin mi-misirangko bajar-antirango bak dongatosa aro gital technology baksa nangdimatosa aro biterangko krae ong·katatachi gisikko miknapatosa uamang kamaina man·gen aro iana miksongen, hajal 10-mangni gita EPO-rangko tarina India sorkari tik ka·aha, jeonikon gong kror 6,850 tangkarangko koros ka·angachi a·songni game-ge·e cha·giparangna bang·a namgnirangko on·gen ine ua agan-talataha.
Re·baenggipa 2022 bilsio game cha·giparangni man·gniko dunagni ong·atani bidingo aganengon, donsogimin nisanona daarien ma·mong aro a·dok sorkarirang aro game cha·giparang aro ICAR gimikan iana ku·monge chu·gimik on·kanga gnang kamrangko ka·atenga aro iani biterangkoba nikanggen ine Union Minister agankuaha.
Game cha·giparangni kamaianiko bariatna miksonge, Atmanirbhar Bharat-ni ning·o gama-ge·anina nangchongmotgiparango jakkalangna chamgimin tangka-paisa gong lak kror 1.50 -ko skanggipa changna sorkari parakataha. Iako on·aniara, songrango game-ge·e cha·enggiparangna mongsong nangchongmotgipako sokatangna gita miksongani ong·a jedakode uanoniko bang·a namgniko man·gen, ine minister taldapataha.
Assam-ni game-ge·e cha·giparangko ra·doanina aro mongsongbate Assam a·dokna mikpakma nie ia sorkari on·kange kam ka·enga, jedakode mikkangchi Atmanirbhar Bharat-na miksonge re·mikkangengon dongimin nisanko chu·sokatanio ia a·dokba on·gilangpana cholko man·gen, ineba minister aganangjolaha.
