Jorhat, Jan 27: Picnic cha•na re•anggipa dolsa manderangoni sakbri, Mongolbar salo Brahmaputra chibimao sripe siaha aro ia mande sakbrini manggisirangko Budbar salo, State Disaster Response Force (SDRF)-ni sipairang Jorhat-oniko man•pilaha.
Brahmaputra chibimao sripe sianggipa mande sakbriara, bilsi 24 ong•gipa Rajia Tikala, bilsi 9 ong•gipa Sufian Chahun, bilsi 15 ong•gipa Sahil Chanun aro bilsi 30 ong•gipa Paban Rai ong•achim.
Police-rangni u•iatani gitade, picnic cha•na re•anggipa dolsa manderangoni bi•sa sakgniko man•chape sakbri manderang, Jorhat jillaoni km 15-mang chel•ao donggipa Baghmara-ni Brahmaputra chibimao sripaha.
Ia a•selni bidingo koborko man•soani ja•man SDRF-ni sipairang ua biapona re•ange chio gimagipa mande sakbriko sandina a•bachengaha.
Police-rangni aganani gitade picnic cha•na re•anggipa sak 10 ba sak 12 manderang, ring bolsao gadoe re•angengachim indiba adita chel•kala biapona sokon ia ring, chio bikpile a•sel ong•aha. Ia picnic cha•na re•anggipa manderang pilakan Jorhat-oni ong•achim.
Ring bikpilani ja•man ringko choenggipa mande baksana gipinrangde an•tangtangko jokatna man•aha indiba bi•sa sakgniko man•chape gimik sakbri manderangde chio gimaaha.
“Mongolbar salo chio sripgipa sakbri manderangni manggisiko chinga man•pilaha. Chinga ia chibimaoniko sandiengkua,” ine SDRF officer parakataha.
Indake ong•engon, ia a•selni bidingo ning•tue sandianirangko dakchina Jorhat-ni deputy commissioner Roshni A Korati ge•etaniko on•ataha.
