Guwahati, February 14: Assam-ni Assembly Election ong·na skang Prime Minister Narendra Modi Sonibar salo a·dokona re·bae salgimik dingtang dingtang biaprangona re·e nianirangko dakenga. Ua Dibrugarh a·jani national highway joljol Moran Bypass-o donggipa Emergency Landing Facility-ona pringni sokbaenba dakgrikanio jakkalgipa sildorengrang aro adasurangni bile mesokanirangko niangaha.
Sonibar salo Assam-ni dingtang dingtang biaprangoni BJP booth-level worker-rang Booth Sanmilan-o bak ra·na Guwahati-ni Khanapara Veterinary Field-ona re·baaha. Prime Minister-ko niksoe uamang uamang kusi ong·e rimchaksoaniko dakangaha aro ia tom·anio PM Modi-an uamangna adita agan-parakatanirangko dakanggen.
Moran Bypass-o tarigimin Emergency Landing Facility-ara skanggipa changna India-ni Salgro Salaram-o iandakgipa cholko tariani ong·a, aro uko nanggitikani somoirango military aro civil aircraft-rangko bilchakatna aro bilonchakna dakchakna inenba Indian Air Force baksa bakrime tariangaha.
Dibrugarh-o tom·ani matchotani ja·mano, PM Modi salni 1 bajimango Guwahati-ona re·bae Guwahati aro North Guwahati-ko nangdimatgipa, Brahmaputra chibima-ni kosako rikgimin Kumar Bhaskar Varma Setu-ko oprake on·anggen.
Salpaksani ja·mano ua Guwahati-o, kror 5,450-na bate ong·gipa dingtang dingtang project-rangna pangchakani ro·ongrangko songe on·anggen.
Uni ja·mano PM Modi Lachit Ghat-ona re·ange IIM Guwahati-ni dikdiksa somoirangna chalaienggipa campus-ko aro Kamrup a·jani Amingaon-o donggipa National Data Centre for North Eastern Region-ko video conference gita oprake on·anggen.
Una agreba, PM-eBus Sewa Scheme-ni ning·o India-ni songjinma dambrina on·enggipa bol 225 electric bus-rangkoba ua nirike watataniko dakanggen.
Na·simang iakoba nina man·gen:
Na·simang iakoba poraina man·gen: PM Modi, Moran Bypass-o Salgro Salaram jolni skanggipa ELP-ko oprake on·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
