Baghmara, Oct 27: South Garo Hills District Karukol Unit ni Garo Students Union, jolni Nokmarang aro songdongenggiparang Karkol oni Tolegre-ona PMGSY ni gita rama tarienggipao RCC dolongo rikanio  gitchamgipa bolni dolongko rikanina hisapgiminko tiktak jarike rikpileganina contractor ni kosako suk ong·gijaniko parakaha.

Mijalo South Garo Hills ni PWD Executive Engineer-na an·tangtangni namnikgijaniko seachi u·iatanio uamang RCC dolongko rikanio gitchamgipa bolni dolonggitasa pilakkon hisape rikenga, RCC dolongnade ra·chakgipa krongna ning·tue a·arangko cho·na nanggenchim aro dolong ku·mangko sorokona nangdimeatanioba jrimani gimin bilakna nanggenchim indiba jekai skango bolni dolongko rikna cho·ahachim aro tariahachim uko apsan ja·rike taripaenganiara bilgriani aro kenchakani ong·gen, uni gimin uko department raken sandianiko dakna nanga ine janapaha.

Karukol Unit GSU ni Padot Te. Matsram N. Marak, ian namen kenbeani ong·a , uni gimin PWD pilak RCC dolong rangna chamgimin tangkarangkon nipiltaibo aro chu·onggijani dongode gital estimate ko tarie watdobo ine aganaha.