Shillong, Oct 28: Mongolbar salo, Meghalaya a•dokni Chief Minister Conrad K Sangma, East Khasi Hills a•jani Pynursla-o gital rikgipa Mini Secretariat aro Circuit House-ko nokdonggae on•angaha.
Ia gital Mini Secretariat aro Circuit House-ko nokdonggae on•anganio a•dokni Chief Minister, jinmana aganprakatengon, ia Mini Secretariat aro Circuit House-ko rikaniara, sorkarini kamrangko nambate chu•sokatna aro manderangna dangdike on•aniko nambatatna sorkarini miksonganian ong•a ine parakataha.
An•tangtangni nangchongmotgipa kamrangna manderang, office damsaoni damsaona re•jojona nanggija biap damsanon matchotna man•na gita sorkari, ia Mini Secretariat-ko rike on•aha ineba ua aganaha.
Sorkarini dingtang dingtang kamrangko chu•sokate on•ani bidingo janapatengon, 2018 bilsio MDA sorkariko rikchengani somoio MGNREGS-na koros ka•ani gong crore 500-na baten komibatachim indiba da•alo crore 2000-mang ong•na sipilengaha ine Chief Minister aganaha.
Apsan daken Pradhan Mantri Awas Yojana (MPAY)-oba skangode bilsiprako te 4000-oni te 5000-mangni gita nokrangkosan sorkari man•soaiachim indiba da•alo bilsiprakon lak 1.5 nokrang gapna siengaha ineba Chief Minister aganaha.
Ia gital Mini Secretariat-ko rikna kam ka•anio bakrimaniko on•ahani gimin, mongsongbate ia nokna a•arangko jaksrambee on•ahani gimin ua songni dilgiparangko aro manderangko mittelpilangaha.
Ia Mini Secretariat aro Circuit House-ko matchotatna gita rakbee kamrangko ka•dilahani gimin a•dokni Chief Minister, dingtangmancha Deputy Chief Minister Prestone Tynsong-koba mittelpilangaha.
Ia tom•anio a•dokni Deputy Chief Minister Prestone Tynsong-ba jinmana aganprakengon, a•dokko namroro silroroatna kam ka•anio Pynursla-koba mongsonggipa ong•e ra•ahani gimin Chief Minister-ko mittelpilangskaaha.
Na·simang iakoba nina man·gen:
Na·simang iakoba poraina man·gen: Motorcycle cha·oronggipa mandeko WGH-o rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
