Tura, Oct 6: Re•baenggipa October-ni 30 tariko ong•atna sienggipa Rajabala Assembly bye-election-o susana gita United Democratic Party (UDP)-ni tikitko Congress dolni MDC Ashahel D Shira-na on•aha ine Budbar salo parakataha.
Rajabala bye-election-o UDP-ni tikitchi susana sienggipa Ashahel D Shira, da•o dipet GHADC-o Batabari GDC constituency-ni Congress MDC ong•engachim aro ia Batabari GDC constituency-ara Rajabala Assembly Constituency-o ga•akgipa ong•skaachim.
Rajabala bye-election-na Congress dolni tikitko sianggipa MLA Dr Azad Zaman-ni jikgipa Hashina Yasmin Mondol-na on•ahani gimin Congress dolni MDC Ashahel D Shira, da•o ia bye-election-o susana gita UDP-o napskaaha aro uandaken Rajabala constituency-ni ning•o Congress dolna kam ka•enggiparangba bakgni daka gita ong•skaengaha.
Rajabala bye-election-o UDP dolni tikitchi susana sienggipa Ashahel D Shira, 2013 bilsini Assembly election-o Independent candidate ong•e susaenba seokako man•ahachim indiba 2018 bilsini Assembly election-ode ua Dr Azad-ni jako amako man•rikskaahachim.
Mukul Sangma-ni chief minister ong•e sorkariko chalaiengmiting somoio ua Congress dolna chakpaaniko on•ahani gimin uko Water Resources-ni parliamentary secretary-ba songahachim. Ja•mano Shira, Congress dolo napahachim indiba 2018 bilsini Assembly election-na Congress dolni tikitko una on•gija Dr Azad Zaman-na on•skaaha aro uandaken Rajabala constituency-o Dr Zaman chegipa ong•ahachim.
Ashahel-ni ambitang Miriam D Shira-ba 1980 bilsirangon Rajabala-ni skanggipa me•chik MLA ong•ahachim aro uni pagipa Lalthuanga D Shira sagiba, changgnina kingking ia apsan Rajabala jolnin GHADC-o MDC ong•angahachim.
Ia bye-election-ara Ashahel Shira-ni brigipa changna susaenggipa election ong•enga. Ua 2008 bilsio skanggipa changna susae Congress dolni Sayeedullah Nongrum-ni jako amako man•aha indiba 2013 bilsiode ua seokako man•skaahachim. 2018 bilsioba ua changsataie Congress dolni jakon amako man•taiaha.
