Shillong, Aug 19: August-ni 19 aro 20 tarikrango PRIME Rural aro Meghalaya Basin Management Agency (MBMA)-ni nangrime ong•atenggipa RURALPRENEUR ’25-ko Mongolbar salo, Meghalaya a•dokni Chief Minister Conrad K Sangma, Shillong songjinmani State Central Library-o a•bachengate on•aha.

Ia program-ko a•bachengate on•anganio a•dokni Chief Minister, jinmana aganprakengon, batanggimin bilsisnini gisepo maikai a•doko bading chiwalani kamrang tang•dobaaha, uarangni gimin gisik ra•atpilaniko on•angenba, a•doko bading chiwalani kamrangko tang•doatna gita a•dok sorkari, bading chiwalanio gisik nanggipa manderangna 2018 bilsio jaantian Chief Minister’s Entrepreneurship Prize-ko gong lak 1 ka•e on•aha ine parakataha.

Ia ja•kuko de•chakatanichi a•dok sorkari, sorkarini kamrangosan pangchakaigija dingtang dingtang bading chiwalani cholrangko ra•na man•na gita chadamberangna dakchakanirangko on•aha ineba Sangma aganaha.

1990 bilsirangni bon•angachibara maikai ua an•tangni bading chiwalanirangko a•bachengatanio neng•nikanirangko chagrongna nangahachim, uarangni giminba Chief Minister, chadamberangna ka•dongatani kattarangko aganangaha.

Bading chiwalanirangko a•bachengatanio chadamberangni chagrongna nanggipa neng•nikanirangko janapatskaengon, chonbegipa dakchakanichiba uamangni kamrango dingtanganiko ra•bana man•a ine Sangma aganaha.

PRIME Urban, PRIME Rural, PRIME Collectives, CM Elevate aro uandakgipa program-rangchi bading chiwalani kamrangna a•dok sorkari, gong crore 1700-na baten tangka paisarangko koros ka•aha ineba Chief Minister aganaha.

Meghalaya a•doko self help group (SHG) gita dakgipa dolrangni dal•rorona man•engani gimin talataniko on•angengon, 2018 bilsina skang gong crore 30-mangni gita tangka paisarangko man•gipa SHG-rang da•o gong crore 1000-na baten dakchakanirangko man•engaha ine Sangma aganaha.

Dingtang dingtang ra•bianirangko chagrongna nanggenchimoba, an•tangtangni kamrangko dontongjachina gitaba Chief Minister ku•pattianiko on•angaha.

Songadam nokadamrango manderangni janggi tanganiko dingtangatna sorkari baksa bakrimgipa dolrang, jekai SELCO Foundation aro uandakgipa dingtang dingtang dolrangkoba Chief Minister mittelpilangaha.

Also Read: GMCH ICU-o atchidaldal bi•sani sianiko am•sandina committee-ko songa

Also Watch

Find latest news from every corner of Northeast India at hubnetwork.in, your online source for breaking news, video coverage.

Also, Follow us on-

Twitter-twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub

Download our app from playstore – Northeast Media Hub