Guwahati, May 23: A·songni skotong Minister Narendra Modi, Indiani Salgro-Salaramni a·dokrang rokomari burung-bolgrimrang, sam-bolrang aro do·o-matrang bang·gipa biap ong·a aro mikkangchi dingtang dingtang janggi tangani cholrangko ra·bana namgipa biap ong·a ine dingtang dingtang karkana aro uandakgiparangko chalaigiparangna didianiko on·aha.
Rising North East Investors Summit 2025-ko da·alo oprake on·on, Viksit Bharat ba a·songko silroro-namrorogipa biap ong·atna Indiani Salaram jolni gamchatani gimin PM Modi talate on·aha aro Salgro-Salaram a·dokrangan iani mongsonggipa bak ong·a ine aganaha.
Ia tom·anio dingtang dingtang karkana dal·giparangni dilgiparang bang·en re·baaha aro ian uamangni gisik nanganiko mesoka ineba ua aganaha. Pilak ministerrang aro a·dok sorkarirangko uamangni kam ka·anirangna aro dingtang dingtang kamrangko a·bachengatna namgipa biaprangko tarianina PM Modi uamangko mitele aganaha aro Northeast Rising Summitna uni nama skaniko on·e, Salgro-Salaram a·dokrangni namroro-silroroanina on·kange kam ka·angkugen ine PM Modi ku·chake on·angaha.
Indiani gisepo Salgro-Salaram a·dokrangon dingtang dingtang jatrang, biaprang, daka-rikani bewalrang, aro uandakgiparang bang·batgipa ong·a. Iano dingtang dingtang karkanarang jekai wa·ani bosturang, cha, petroleum, kal·susaanirang aro changa-sapanirangko bang·en nikna man·a aro uandake ia a·dok damprakan mikkanchi nambata cholrangko ra·bana aro re·mikkangna tarisamsoenga ineba ua aganangaha.
Batanggimin bilsi 11ni gisepo, Salgro-Salaram a·dokrango bang·a dingtanganirangko nikna man·aha, aro Union Ministerrang chang 700 ia biapona grongna re·baanirangko dakaha aro uandake an·tangtangni gisik nanganirangko mesokaha aro manderangna ka·donganiko on·aha ine, “Changsao diltugipa jolrang ine channako man·gipa biap, da·ode Indiani namroro-silroroaniko ra·baanio dilgipa ong·enga,” ine PM Modi agandapangaha.
Uandake, Salgro-Salaram a·dokrango namgipa rama-jal jal·angangrangko rikna ine hajalni hajal kror tangkarangko tikataha jekai Arunachal Pradeshni Sela Tunnel aro Assamni Bhupen Hazarika Dolong. Una agreba, 11,000 kilometrerangni highwayrang, rel ramarang, airportrangko bang·bate tarianirang aro Brahmaputra aro Barak chibimarango chi-ramarang aro ritchani ritcha mobile towerrangko songanirangko dakaha ineba Modi janapataha.
Guwahati, Imphal aro Agartala-ko Multi-Modal Logistics Hubrangko da·o tarienga ine, Meghalayao Land Customes Stationrangko a·bachengatenga aro Mizoramo gipin a·songrang baksa bading-chiwalani cholrangko apalbatatenga, aro iarangko dakanichi mikkangchi gital cholrang aro janggi tangani gadangrangko namdapatna man·gen ineba ua aganaha.
A·gilsako gimik an·seng-baljokani aro sanna-bananiko on·a niksamsoe Indiani Heal in India initiativeko a·gilsak gimikon a·bachengatenga aro Salgro-Salaram a·dokrangni rokomari sam-bolrang, burung-bolgrimrang, do·o matrang donganichi ian an·seng-baljokaniko ra·bana namgipa biap ong·gen ine Modi parakataha.
Uandake ia a·dokrango doka-dam·ani, chrok-mesaani aro manianirang bang·en donga aro uandake ia a·dokrang a·gilsak gimikni tom·anirang, manianirang, aro uandakgiparangko ong·atna namgipa biap ong·a aro uandake tourismni tang·doanikoba nikna man·enga maina da·o songrango homestayrang, aro biapko mesokdilgipa ba guiderangni kamrangko ka·e ka·na janggi tangani cholrang aro uandakgiparangko bang·en nikna man·enga aro mikangchina namdapatnaba cholrangko bang·en ra·bana nangkuenga ine PM aganaha.
13,000 kilometrerangni optical fibre expansion, 4G aro 5Gko ra·baanirangkoba janape aro technologyni bidingo bang·a namroroani cholrang donga aro mikkangchi Indiani digital cholguga ong·naba chol donga ineba ua aganaha. Changa-sapanirangko skie on·aniko nangchongmota, uandake ma·mong sorkari poraia-skianirang aro changa sapanirangko skie on·a batanggimin bilsi 10-ni gisepo kror 21,000 tangkarangko koros ka·aha ine talataha.
A·gilsak gimikon organic ba mamung sam jakkalgija ge·a-gamaniko dake man·gipa cha·anirangkosa nangnikbatengaha aro iana PM Modi Indiao tarigipa cha·anirangko a·gilsak gimikona gipatna skenga aro Salgro-Salaram a·dokrangan iako chu·sokatnaba man·gen ine re·anggipa bilsi 10-o ia biaprango organic ba sam-gri ge·a gamani changgni bariaha aro namgipa rokomni cha, anaros, komila, kakji, holdi aro e·chingrangko man·ani gimin gipin a·songrangchiniba uko brena nangniktokenga ine koborko man·aha.
“Salgro-Salaram a·doko dingtang dingtang karkanarang jekai solar power aro hydropowernaba cholrang donga aro biaptangon iarangko dakna man·genchimode a·palchini ra·bana nanganirangko mikkangchi namen komiatna man·gen”, ine Modi parakataha.
Dal·dalgipa karkanarangni manderangko ku·cholsan kam ka·e namroro-silroroaniko ra·bachina ua didiaha aro changgipino Rising Northeastko ong·atani somoiode India chu·sokanio re·mikkangnok ineba PM Modi aganaha.
Dingtang dingtang union ministerrang aro Salgro-Salaram a·dokrangni skotong ministerrang aro a·songni dingtang dingtang bakrangoni karkanarangko chalaigiparangba ia tom·aniona re·baaha.
Reliance Industries Ltd.ni Chairman aro Managing Director, Mukesh D Ambani, ia a·dokrangko namdapatna dingtang dingtang bakrango jekai ge·a-gamani, sanna-banani, rama-jal·angrangko tariani, kal·susaanirang aro uandakgiparangna kam ka·anina chanchisamsoaniko jinmana talate on·aha aro Reliance Foundationni jako ra·e kam ka·enggiparangko janapaha aro a·dok dam-cheton Olympic Training Centrerangko mikkangchi tarina chanchisoenga ineba parakataha.
Na·simang ia video-koba nina man·gen:
Na·simang iakoba poraina man·gen: Siang Chibimao Dam kana siengani gimin Arunachal Pradesh-o jinma jegala
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
