Shillong, Jan 29: A·dokni dakchakgipa skotong minister Pa Prestone Tynsong, Sports and Youth Affairs-ni minister Pa Banteidor Lyngdoh baksana Urban Affairs-ni minister ong·e nirokatenggipa Pa Sniawbhalang Dhar-maangni dongpaanio da·al Sukrobar salo saliram Jaintia Hills-ni Wahiajer songo rokom-rokom kal·susaanirangko kal·chakram biap ba Multi Sports complex-ko rikna gita Meghalaya-ni skotong minister Pa Conrad K. Sangma, pangchakani ro·ongko songe on·angaha.
“An·chingo changgipa-sapgipa chasong damberang bang·en gnang jemangan kal·susaaniko uamangni janggi tangao mongsongbatgipa dake ra·na sikgiprang ong·a, indiba kal·susaanio nangchongmotenggipa minganti chu·onga gita dongjani a·sel aro ranta ka·anirangko chu·onge man·jani a·selo bang·a chasong damberangni gisiko nikjumanggiparang chu·sokgija ong·tokenga,” ine skotong minister suk ong·gija aganaha.
Batanggimin sorkarini somaio, a·songo aroba gipin a·songrango dingtang dingtang kal·susaanirango bakko ra·e cheeming medalrangko man·bae a·dokna mikkim-rasongko ra·bagipa kal·susagiparang a·dok sorkarioniko mangmang gong 7000 kosan man·rongachim ine manderangna gisik ra·atpile aganengon, da·o MDA sorkarini ning·o hajaloniko lakrangona sokdoatskaaha aro iachi kal·susagiparangko gisiko namen bimchipdapatani ong·gen, ine Pa Conrad agan-parakaha.
Indake ong·engon, saliram Jaintia Hills-o Wahiajer Multi Sports Complex-ko rikna gita nangenggipa tangka-paisarangko State Plan Scheme 2021-22 aro Sports Authority of India Khelo India Infrastructure scheme-ni gita jakkalanggen aro ia de·e-minge ra·baenggipa project ba kamrangko matchotatna gita ja 18 somairangko donsoengon, iana chu·gimik gong 24,97,11,000/- (Kror Kolgrik-bri, lak Sotsku-sni aro hajal Chi·sa) korosrangko ka·anggen.
Ia Multi Sports Complex-ko sub base aro AIFF-ni ra·chakgimin synthetic football turf aro AFI-ni ra·chakgimin synthetic athletics track ba katsusachakna biaprang gnang baksa rikatna gita tarisomanaha. Apsandake, kal·susagipa dolni jakkalani kutturirang, officialrangni kutturi, office-na biaprang gimikan uno dongchapjolgen.
Unbaksana, Wahiajer Multi Sports Complex-o gimik sak 2000 oni 3000 ona bang·a manderang asongchakna man·e, nigiparangna suk ong·e asonge niani biaprang aro VIP-rangnaba dingtangmancha biaprang dongjolgen.
