Shillong, July 19: Wachini somoirango mongsongbate neng·nikaniko man·batgipa Shillong-oni Dawki-ona gimik km 85-mang chel·gipa ramako apale tariatenganichi sima-arirangko nitimatani kamrango mikkangchi bang·en namgniko on·gen ine Meghalaya Frontier-ni Border Security Force-ni Inspector General Pa Hardeep Singh parakataha.
Pa Hardeep Singh-ni aganani gita, sima-arirango donge nitimani kamrang ong·engmitingo ia ramako taridapataniara namgni ong·chongmotgen aroba simarango pilak ong·gija kamrangko champenganioba dakchakani ong·gen.
Ia ramako apale tariatengani a·selo Border Security Force aro dingtang songrangba ianoniko dingtangmancha namgnirangko man·gen ineba Pa Hardeep Singh parakataha.
Iani bidingo National Highway Infrastructure Development Corporation Limited (NHIDCL)oni u·iatani gitade, skanggipa chamatgipani ning·o gimik km 11-rangona gari bol-bri re·sretgrikna man·gipa ramako gong kror 91.26 korosrangchi tarina gita SS Infrazone Pvt. Ltd-ni jako on·aha aro iako matchotatna re·baenggipa 2023 bilsini December jako donataha.
Gnigipa chamatgipani ning·o gong kror 210 korosrangchi gari bolgni re·sretgrikna man·gipa km 26 mang chel·gipa ramako apalbatatna aro taridapna gita ARSS Infrastructure Projects Ltd-ni jako on·aha.
Janapna gita, Shillong-Dawki ramako taridapatna chanchie ra·bagiminni ning·o bilsi-bongarang ja·man, tangka-paisarangko chang-bri dake contractor-rangna chamataha aro kamrangkoba a·bachengengaha.
Unomiting, SS Infrazone Pvt. Ltd-ni ua ramako tariatenggipa Deepak Kumar-ni aganani gita, on·gimin somoina skangan matchotatna gita uamang jotton ka·enga, indiba basakoba mikkarang wae a·a ruronganichi kamko dontongatna nangao ga·akenga.
Ia project-na tangka-paisako bak-bri dake chamaha jeoni gittamgipa chamatgipakode da·odipet man·sokujachim.
Apsandake, SS Infrazone Pvt Ltd-naba gong kror 88.2-ko chang-bri dake chamataha, jeon 45.760 km-oni 63.530 km-ona ramarangko taridapani aro apalatni kamrangko man·chapa.
Neeraj Cement Structural Limited-naba 63.530 km-oni 71.520 km-ona gimik km 7-rang ong·gipa ramako apalatna aro namdapatna gita gimik gong kror 141.14-ko chang-bonga dake chamataha.
