Shillong, Oct 31: Shillong Government Engineering College-ni skanggipa academic session-ko Sukrobar salo, Meghalaya a•dokni Chief Minister Conrad K Sangma, Shillong songjinmani Mawlai-o donggipa college campus-o a•bachengate on•angaha.
Ia college-ni academic session-ko a•bachengate on•anganio, a•dokni Deputy Chief Minister Prestone Tynsong, Education Minister Lahkmen Rymbui, Arts & Culture Minister Sanbor Shullai, Chief Secretary Dr Shakil Ahammed, Education-ni Commissioner & Secretary Vijay Kumar Mantri aro gipinrangba dongpae bak ra•angaha.
Ia tom•bimonganio a•dokni Chief Minister, jinmana aganprakangengon, a•dokni skanggipa Government Engineering College-ni skanggipa academic session-ko a•bachenganiara a•dokna gisik ra•beani sal ong•enga aro ia salko a•dokni manderang maming saloba gualna man•jawaha ine aganaha.
Ia engineering college-ko chu•sokgipa ong•atanio rakbee kamrangko ka•gipa Education department, minister-rang, officer-rang, aro pilakkon ua mittelpilangaha.
Meghalaya a•dokko technology-chian ta•rake namroro silroroatna man•gen ineba Chief Minister aganaha.
Nvidia-ni official-rang, Meghalaya a•dok baksa bakrime kamrangko ka•na cholrangko nina gita a•dokona re•baaha ine janapatengon, ia program-ni ning•o sak 50 chadamberangna training on•na gita a•bachengaha aro mikkangchi sak 200 ba 300 chadamberangna training-ko on•na miksonganirang donga ine Chief Minister aganaha.
Iandakgipa cholrangan Meghalaya a•dokni chadamberangna, dingtang dingtang kamrango gital cholrangko on•skagen ineba ua aganaha.
Shillong IT Park-ni gnigipa bakko December jao a•bachengatgnok aro iano dam 3000 seat-rang donggen ine janapatskaengon, da•o ia IT Park-ni gnigipa bakko a•bachengna skangan UK a•songoni company ge•sa, iako chalaina gisik nangenganiko mesokaha ine Sangma parakataha.
Meghalaya a•doko technology-ni dal•rorobaengani gimin janapatengon, salgro salaram a•dokrangna National Artificial Intelligence Conference-ko re•baenggipa December 3 aro 4 tarikrango Shillong-o ong•atanggen ine Chief Minister parakataha.
Chatro chatrirangni man•na nangenggipa scholarship-rangni gimin janapatskaengon, India sorkarini tangka paisa watataniko senggijan Meghalaya sorkari, tangka paisarangko skang on•sognok ine Chief Minister parakataha.
Chief Minister’s Scholarship Scheme-ko Krismasna skangan a•bachengatgnok aro ma•mongoni on•enggipa scholarship-koba India sorkarioni tangka paisarangko watatna skangan a•dok sorkari watatgnok ineba ua aganaha.
Mandena u•i-ma•siani aro kamo changa sapaniko on•na gita sorkarini ka•enggipa kamrangni giminba Sangma aganangaha.
Shillong Medical College-ko a•bachengatani gimin janapatskaengon, ia college-ko da•o antisa ba antignini gisepon kulie on•na gita Prime Minister ba Home Minister-ni u•iatanina sengkuenga ine Chief Minister parakataha.
Chatro chatrirangkoba ua dal•e jumang nikchina, chue nisanko donchina aro an•tangtangni miksonganirangko chu•sokatchina gita agan-ku•pattianirangko on•angaha.
Ia tom•anio, a•dokni Deputy Chief Minister Prestone Tynsong-ba aganprakangengon, a•dokni skanggipa engineering college-ni principal, skigiparang aro sak 50 chatro chatrirangna an•tangni namgipa skaniko on•angenba, Meghalaya a•doko lekka porako namdapatna gita rakbee kamko ka•angani gimin sorkariko mittelpilangaha.
Ia college-ni academic session-ko a•bachengatanio, a•dokni Education Minister Lahkmen Rymbui-ba jinmana aganprakengon, Meghalaya a•doko chubata gadangni lekka porako on•anio ta•raken dingtanganiko nikna man•engani gimin an•tangni kusi ong•aniko parakangaha.
2018 bilsina skangde Meghalaya a•doko sorkari college-rang dambongasan dongaiachim ine janapatengon, Chief Minister Conrad K Sangma-ni dilanichi batanggimin bilsisnini gisepo Mawkyrwat, Rongjeng, Patharkhmah aro da•o Shillong-ko man•chape dingtang dingtang biaprango gital institute-rangko kulidapna man•aha ine Education Minister aganaha.
Na·simang iakoba nina man·gen:
Na·simang iakoba poraina man·gen: M’laya sorkari sak-283 special educator-rangko kam-o rakkikamaniko ra•chaka
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
