Tura, May 5: Shillong-oni Garo Hills-ona re•bapilenggipa manderang pilakan COVID-19-na porikka ra•e nitelna nanggnok ine Budbar salo West Garo Hills a•jani Deputy Commissioner Ram Singh parakataha.

“Shillong-oni re•bapilenggipa manderang pilakan COVID-na porikka ra•e nina nanggen,” ine West Garo Hills a•jani Deputy Commissioner, West Garo Hills District Administration-ni facebook post-o parakataha.

East Khasi Hills a•jaode Budbar attam 8:00 bajioni a•bachenge May 10 tarik attamni 5:00 bajiona kingking a•dok sorkari, chu•gimik lockdown-ko ra•gatangahachim.

Indake ong•engon, Shillong, Tura aro Jowai-oba a•dok sorkari niamrangko rakbatate, gipin a•jarangode Sonibar aro Robibar salgnina lockdown-ko ra•gatskaenga.