Shillong, May 28: Meghalaya a·dokoni pilak nokdang dakgimin me·chikmarang aro me·chikrangko tangka-paisani bidingo bil gnangatna gita Meghalaya Skill Development Mission baksa nangrimenba, Shubham Charitable Association, boloniko sol·e-repe dingtang dingtang nitogipa bosturangko tariani bidingo Shillong-o jasana training programko ong·atangaha.
Ia skie on·ani programo, sak 30 mangni gita me·chikrang bakko ra·e dingtang dingtang rokomni bolrangoniko nokrango donani nitobegipa bosturangko sol·e-repe bimang ong·atani gimin skie ra·anirangko dakangaha aro ia programo, dingtangmancha sol·na-repna changgipa Craft Master, Prakash Verma, uamangna skie on·angskaaha.
Unomiting, ia training programko ong·atgipa Shubham Charitable Association-ni ma·dot aro organization-ko a·bachengdilgipa Ma Pushpa Bajaj, ia training programni bidingo aganangengon, me·chikrangko tangka-paisani bidingo bil gnangatna gita jakma-ba·kuo dingtang dingtang sapgipa me·chikrangna batanggimin bilsi 25-rangna kingking skie on·ani programme-rangko ong·atenga aro organization-ko bimang ong·ataoni da·alona, sak 22000 me·chikma aro me·chikrang bang·en namgniko man·tokaha ine parakangaha.
