Tura, June 21: Manderangni namen nichaksoenggipa skanggipa changna ong·atgipa Tura Challenge Inter-Mahari Basketball Tournament 2025-ko Sukrobar salo Tura-ni Don Bosco College basketball Court-o ong·ataha.
Ia tournament-ara Meghalaya-ni skotong minister Conrad K Sangma-ni dakchakanichi Krimkro Socio Cultural Club New Tura, District Sports Office, Tura aro District Basketball Association-ni (DBA) nangrime ong·atgipa ong·a.
Ia sal-10na kal·susaanirang June 30-ona kingking ong·anggen, aro ian Krimkro Socio Cultural Club-ni bilsi 25 ong·aniko maniani bak ong·a. Uandake ia kal·susaaniko ong·atani miksonganiara Garo Hills-ni dingtang dingtang chatchi-maharirangni gisepo meli-nangrimaniko ra·bana aro kal·susaanirangko dake be·enko ranta ka·anichi chamdaberangni gisepo an·seng-baljokaniko ra·bana ine ong·a.
Skanggipa salo changgittam kal·susaanirangko nikangaha. Me·asarangni kal·anio, A·gitok Mahari-ni kal·susagiparang Mrong Mahari-ni kal·susagiparangko 75-44-ko man·e namen amaha.
Me·chikrangni skanggipa kal·susaanio, Gabil Mahari-ni susagiparang 16-12 man·e Bolwari Mahari-ni susagiparangko on·tisani pal amaha. Kal·susaani skanggipa bak gittamo Gabil Mahari kal·aniko dilaha, bon·kamgipa bako Bolwari tang·dobapilahaoba Gabil Mahari-an chegipa ong·aha.
Gnigipa susaanio Mrong Mahari Rangsa Mahari baksa kal·susaaha. Dolgnian susagrike ga·subee kalvangaha indiba bon·kamao 16-13 man·e Mrong Mahari chegipa ong·aha.
‘Tura Challenge’-o chu·gimik dol-10 me·chikrang aro dol-16 me·asarang bak ra·enga aro re·baenggipa sal-9-o kal·susaanirang ga·subatroronasienga.
Uandake, kal·susaanirangko oprakanio District Sports Officer Saljagring M Marak, Krimkro Socio Cultural Club-ni President Walseng Ch Sangma, SDB Principal Don Bosco College Fr. Januarius S. Sangma bak ra·angaha aro uamang songsarni dal·roro-silroroanio kal·susaani gamchatani gimin aganangaha.
Una agreba, District Social Welfare Office “Nasha Mukt Bharat Abhiyan”-ni bidingo aro songsaro donganio pekgipa bosturang gri janggi tangani gamchatani bidingo mikrakataniko on·angaha.
Na·simang ia video-koba nina man·gen:
Na·simang iakoba poraina man·gen: Rengmagre songo doka-dam·ani bosturangko CM sualata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
