Tura, March 7: Skotong Minister Conrad K Sangma Sonibar salo West Garo Hills-ni Tura, Hawakhana-o Nehru Ading Locality Beautification Project-ko oprake on·angaha.
Ia programme-ko Nehru Ading Development and Welfare Committee (NADWC) Nehru Ading-ni Gilja nok gittcham mikkango ong·atangaha. Gittimni dilgiparang, songdonggiparang aro committee-ni manderang ia tom·bimonganiona re·bae gittim-ko namdapate tariani aro nitobatatani kamrangni matchotaniko mesokangaha.
Tom·bimongani a·bachengon NADWC-ni President Cameron N. Sangma rimchaksoani kattarangko aganangaha aro uni ja·mano HBC Tura-ni Assistant Pastor Evie Pamade R Marak Nokgipao bi·aniko dilangaha.
Project-ni bidingo NADWC-ni Secretary Melvilline R. Momin talate on·angaha, aro gittimko nitodapatani miksonganirang aro kamrangko agane on·angaha.
Tom·bimonganiko dakengmitingo, a·dokni skotong minister ia project-ko a·bachengatani ro·ongko oprake on·angaha.
“Anga angni skotong minister ong·anio ia gittimona skanggipa changna re·bana man·e namen kusi ong·enga,” ine ua aganenba, Tura-o dingtangroroani ka·sine aro name ong·angenga, indiba bang·a kamrangko ka·na nangkuenga ine patakataha.
Uandake, Tura songjinmako namdapatanina kror 700-na batani dingtang dingtang kamrangko ka·engaha ine ua u·iataha.
Smart City Mission-ni ning·o, dingtang dingtang gittimrangni ning·o donggipa ramarangko tarina Kror 60 tangkarangko tikataha ine ua aganangaha. Una agreba, Phase I-o sorokrango bijolirangko tekna aro biaprangko nitobatatna kror 15 tangkarangko koros ka·aha aro Tura Bazar-ko nitoatna dingtangmancha kror 15 tangkarangkoba tikataha.
City Beautification Drive-ko dakengani giminba Skotong Minister janapenba, songjinmani dingtang dingtang sorokrango CCTV camera-rang aro bijolirangko tekani gimin aganangaha. “Airport-rang, 5 Star Hotel-rang, rama-jal·angrang, CCTV network-rang aro soroko bijolirang pilakan Tura-ko dingtang nambata gadangona ra·dona nangchongmotgipa ong·a,” ine ua aganangaha.
Ia Drive-ni gita, Tura-ni dingtang dingtang biaprango ge 350 CCTV Camera-rang aro ge 500 sorokni bijolirangko tekenga ine ua u·iataha. Nehru Ading gittimna, ge·bri CCTV camera-rang aro ge·dok sorokni bijolirangko on·ataha.
Gittimo rongtal-an·talaniko rakkianina songdonggiparang kam ka·na nangchongmota ineba Skotong Minister aganangaha. “Japan-ode na·simang sorokrango jabol gal·chakramrangko nikjawa. Manderang an·tangtangni jabolrangko chimongna chonchongipa jolarangko ra·bita aro uarango jabolrangko chipe noktangtangchina galna ra·angpila. Manderang an·tangtangan rongtal-an·talanina simsakna nanga,” ine ua aganenba, gittimo namdapatgiminrangko ripingna aro rongtal-an·talataniko rakkichina manderangko didiaha.
Gittimni manderang baksa agangrikanirangko dakon, bang·a neng·nikanirangko aro namdapatani cholrangko manderang janape on·angaha, jekai community hall-ko nangani, aro gittimko nitoatanio nangdapgipa dakchakanirang. Una agreba Hawakhana Government L.P. School-na guare kadapna nanganiko aro skul nokko namdapatna nanganikoba uamang janapangaha.
Unbaksana, Jerusalem Junction-o pekgipa bosturangko pala-sim·ani aro breanirangko dakengani giminba gittimni manderang aganangaha. Ua jolo donggipa SSA school-o chi-rangko sale on·naba nangenga ineba uamang skotong ministerna agandapangaha.
Programme-ko ong·atengmitingo NADWC-nni manderang uamangni gittimo namdapatna nangchongmotenggiparangni bidingoba memorandum-ko on·angaha, aro bon·kamao Andy Tengsak R. Marak mitelani kattarangko agane tom·aniko matchotataha.
Na·simang iakoba nina man·gen:
Na·simang iakoba poraina man·gen: AFC Women’s Asian Cup-o goal chipanina M’laya CM Sanfida Nongrum-na tangka lak 2-ko boksis on·na ku·chaka
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
