Shillong, Sept 1: Meghalaya a·dokoba gnigipa changna COVID-19 giprorotaiahani gimin baditaba jarangna chipe donatani ja·man skulrangko sorkarini dongimin niamrango pangchake Budbar sal dipet kulipiltaina a·bachengaha.
Shillong songjinmao skulrangko kulipiltaiahaon chatro chatrirangni skulrangchi re·ruraanirangko nikna man·piltaiaha indiba da·o dipet bang·gija chatro chatrirangni re·ruraanirangkosan nikna man·engkua.
Skulo poraienggipa chatro chatrirang, skultangtangchi re·engon an·tangtangni skul uniform-rang baksana da·o mask-rangkoba gane skulrangchi re·angtokaha.
Indita jarangna chipe donani ja·man skulrangko kulipiltaiahaon bang·bata chatro chatrirangan, skulrangchi re·piltaina kusi ong·anikoba paraktokaha.
Mitam chatro chatrirangni aganani gitade, skulrangko chipe donengmiting somoio uamang an·tangtangsa lesson-rangko poraina gita nangahani a·sel neng·nikanirangko chagrongna nangtokaha aro da·o skulrangko kulipiltaiahani gimin uamang skigiparangonikon mikkanggrike skie ra·piltaina cholrangko man·gnok.
Skulrangko chipe donengmiting somoio internet gita class-rangko ra·ahaoba bang·bata biaprangon internet-rangko name man·jani a·sel class-rangko ra·anio neng·nikanirangko chagrongna nangaha ine mitam chatro chatrirang aganskaaha.
Internet gita an·tangtangni lesson-rangko skie ra·na man·genchimoba classroom-rango asonge skigiparangoniko skie ra·ani gitade ong·ja ineba mitam chatro chatrirang skulrangko kulipiltaiahani gimin an·tangtangni kusi ong·aniko paraktokaha.
Apsan daken, skigiparangba skulrangko kulipiltaiahani gimin an·tangtangni kusi ong·aniko parakattokaha.
Meghalaya a·doko skanggipa changna COVID-19 giproroani ja·man re·anggipa 2020 bilsini March ja dipetan, skul, college aro uandakgipa skie ra·chakram biaprangko chipatahachim aro skulrangko re·anggipa bilsini December jao mitam bakrangkode kulipilahachim. Indake ong·genchimoba ia 2021 bilsini May jamango gnigipa changna COVID-19 giprorotaiani ja·man skulrangko chipe donattaina nangao ga·akaha aro uandaken adita salrangna skangsan a·dok sorkari, chanchirimangtaienba niamrangko done skulrangko kulipiltaina tik ka·angaha.
