New Delhi, Feb 11: Da·al Bristibar salni bako, Meghalaya a·dokni Chief Minister Conrad K Sangma, a·songni Prime Minister Narendra Modi-ko grongenba, ma·mongni kajinarangoniko gong kror 5,105 aro ia bilsina gong kror 1,279 tangkarangko Revenue Gap Grant dake Meghalaya a·dokna on·atengani gimin mittelpilangaha.
15th Finance Commission-ni ku·pattianio pangchake a·dokni dingtang dingtang project-rangko ra·chakchina gitaba ua a·songni Prime Minister-ko didiangaha.
Chief Minister-ni parakatani gitade, ia project-rangara Meghalaya a·doko namroro silroroaniko ra·baanio pilakni gitan dakchakani ong·gen.
Meghalaya a·doko ding·a sin·ani gita dingtangrorobaaniko chel·chakna a·dok sorkarini ja·ku de·samsoenggipa kamrangni bidingo a·songni Prime Minister-na talate on·angengon, bilsiantian Meghalaya a·doko 3,700 mm-ni gita mikkarang waengani gimin ia mikka chirangko rakkina gita sorkarini rikenggipa tengkirang aro uandakgipa dingtang dingtang kamrangni bidingo Chief Minister, agan-talate on·angaha.
“Rakkie ra·rikgimin mikka chirangkon a·doko ringanina, ge·a gamanirangna, na·tok jilanirangna aro Tourism-ko namdapatna jakkalanggen. Ia project-na a·dok sorkari, USD million 100-ko Economics Affairs department-o bi·atmanaha,” ine Chief Minister parakataha.
Meghalaya State Water Mission-ni bak gita a·dokni dam 6500 songrango Natural Resource Management volunteer-rangko songenga ineba Chief Minister parakataha.
Chief Minister-ni u·iatani gitade, ia volunteer-rangko jatni dakani rikaniko u·i-ma·sie ra·an baksana ding·a aro sin·ani dingtangrorobaenganiko chel·chaksona gital chasongni ostrorangko jakkalani bidingo skie on·anggen.
Salgro salaramni pilak chief minister-rang baksa aro gisik a·ning bite u·i-ma·sigipa manderang baksa nangrime, ding·a aro sin·ani dingtangrorobaengani bidingo aro samtangtango ong·telaigiparangko ripinge rakkiani bidingo international conference-ko Meghalaya a·doko sokachakna miksongenga ineba Chief Minister Conrad Sangma, a·songni Prime Minister Narendra Modi-na parakataha aro ia program-ko da·o jagittamni gisepo ong·atna man·na gita somoiko on·china Prime Minister-ko didiangaha.
Indake ong·engon, salgro salaram jolrango mongsonggipa project minggni, chong·motan Brahmaputra chibimako kabatgipa dolongko man·chapgipa Silchar-Mahendraganj-Hili rama aro Guwahati-Shillong-Dawki-Sylhet-Chittagong ramako 8-lane dake tariani bidingoba a·dokni Chief Minister, PM Modi-na janape on·angjolaha.
