Shillong, Sept 20: ‘Sur ki Nong Mawlai’ ba Mawlai-o songdonggipa manderangni ku·rang dolni gita police-ni jako goa man·e sianggipa HNLC-ni gitcham dilgipa Cheristerfield Thangkhiew-na kakket bichalko dabie dingtang dingtang dake jingjengatanirangko ong·atani bak gita Sombar salo Shillong Civil Hospital-ni mikkangchakgipa Barik-o jinma asonge jegalaniko dakangaha.Mawlai joloni KSU, FKJGP aro HNYF dolrangni asonge jegalaniko ong·atanggipao Sur Ehrngiew ki Nong Malki, Sur ki Nong Upper Shillong aro Sur ki Nong Ri-Bhoi ia dolrangba ja·mano bakko ra·angdapaha. Shillong-o Meghalaya sorkarini kosako jegalenggiparang, batanggimin August 13 tarik walo operation-ko ong·ato jak donggipa chugipa gadangni police official-rangko kam dondipatchina gita sorkario dabitokengachim.Indake ong·engon, sianggipana kakket bichalko dabianio Sur ki Nong Mawlai dolni manderangni gisepo adita meligrikgijani a·sel bakgni dakaniko nikna gita man·skaenga.
Uandaken Sombar salo asonge jingjengatanioba, Sur ki Nong Mawlai dol baksa bak ong·pagipa dolchet gipin organisation-rangni bakko ra·angpagijanichi dingtang dingtang ong·taiaha jenan bak ong·pagijagipa Seng Samla Mawlai Pyllun, HYC Mawlai Circle, HANM, MPGF, MIPF, UHM, HUAM aro TULBA, iarangni matnange aganangani gitade, sianggipa Thangkhiew-na kakket bichalko on·china pilak dabianirangkon KSU, FKJGP aro HNYF ia golgittamchisa chalaigopenga. Iamang dolgittamni nichangalako man·gipa dolchet gipin organisation-rangni jinmana seachi u·iatanganio kakket bichalna miksonge dabianirango iamang dolgittamni chu·gimik chalaigopanina suk ong·gijanikoba parakangtokaha.
Unbaksana, Sur ki Nong Mawlai dolko bakgni ong·ate “Divide and Rule” policy-na miksonge kamko ka·anio Meghalaya sorkari chu·sokgipa ong·aha ineba dolchet gipin organisation-rang janapatjolaha.