Tura, Oct 09: Cha·ani-ringanirangko chu·onga gita man·pagijagipa aro tuberculosis (TB) sagiparangna, West Garo Hills a·jani District TB Officer-ni office, Tikrikilla PHC-ni ning·o donggipa kangal-cholgrigipa sak 17 TB sagiparangna mandeni be·enna bilak-mangrakaniko on·gipa cha·anirangko suale on·angaha.
Ia be·enna bilak-mangrakaniko on·gipa cha·anirangko Meghalaya-ni skotong minister Pa Conrad Sangma-ni jikgipa Dr. Methab Chandee A. Sangma on·gilataha. Ia cha·anirangko, mijao a·bachengatgipa TB health scheme, “Pradhan Mantri TB Mukt Bharat Abhiyan” ni bak gita TB sae chu·onga gita cha·ani-ringaniko man·pagijagipa manderangna cha·anirangko on·na miksonge ra·gatgipa “The National Tuberculosis Elimination Programme”-ni bimingo TB sagiparangna suale on·angaha.
Sagipa mandena nangchongmotgipa cha·anirang jekai, dal, chana, nutrela aro protein biscuit-rang gnanggipa cha·anirangko bilsisana kingking jaantin suale on·anggen. Ua cha·anirangko, District TB Officer, Dr. Litha Sangma; Medical officer, Dr. Thimonier Momin; Joint Director-oni neng·take donggipa aro saksa Social Worker ong·e dangdike on·enggipa Dr. Khona-maang, TB sagiparangna suale on·angaha.
Unomiting, Dr. Litha, TB saani baksa dakgrikna mandeni be·en ning·o donggipa sabisiniko warachakgipa immunity-ko bilakatna gita be·enna mangrakaniko on·gipa cha·anirangni namgnirang aro uni gamchatanirangni gimin aganangan baksa, TB saaniko namatna somoi gita pangnan cha·aniko cha·na aro samrangko ringna nanga aro be·enna namgijako ra·bagipa ta·makku aro churangko jakkaljachina gitaba agan-ku·pattiangjolaha.
Dr. Khona, rongtal-an·tale janggi tanganio gamchataniko aganangani ja·man, distict-oniko aroba a·dok gimikoniko TB sabisiko bon·atna gita aro TB sagipa gri songsalo janggi tangna man·na TB sagiprangna dakchakanirangko on·china gita sakanti bak man·giparangkon bakrimchina didianikoba on·angaha.
Indake ong·engon, Ma Nochi Sangma aro STLS Zaman-maang, TB sabisiko bon·atna gita re·mikkanganio Tikrikkila PHC-ni ning·o donggipa songrangni manderangna an·seng-baljoke donganiko tang·doatna gita didianirangko on·an baksa, sabisini gimin manderangna ma·siate on·angenba TB sagiprangna kenjachina, indiba uamangna nangan somoio dakchakanirangko on·china gita agan-ku·pattianirangkoba on·angaha.
