Shillong, Oct 09: Songjinmao donggipa Muslim manderang, Hazrat Prophet Sahib-ni atchiani salko Robibar salo gisik-ka·tongrango katchaanirang baksa maniangaha.

Prophet Sahib-ni atchiani salko a·dokni skotong songjinmao manianganio, Muslim manderang skorango ba·rarangko kae, nisanko jakbite aro banner-rangko ra·e songjinmani ramarango re·jomanirangko dakenba uni atchiani salko gisik ra·angtokaha.

Mande jinma re·jomaniko, Jhalupada Medina Masjid ong·atangaha jeon buchuma-budepa, bi·sa-desa, chadambe pante-me·tra, me·chik aro me·arang gimikan gisiko katchaanirangan gape bakko ra·angtokaha.

Prophet Mohammad-ni atchiani salko gisik ra·ani gita, procession-e-Mohammedi-ko ong·atgipao bak ra·angpagipa Jhalupada Madina Masjid-ni Imam, Hafiz Mohammad Firoz-ni aganani gita, mande jatni songsalo janggi tanganio pilak namgijanirang, mitchigrikanirang, ka·a nanganirangko gelchina gita Hazrat Mohammad Sahab-ni agananggimin kattarang da·alona kingkingba chinga sakantikon didiani ong·chongmota ine parakataha.