London, Oct 9: India a·songni salgro salaram jolo donggipa damchet a·dokrangni daka rikaniko mesokna gita re·anggipa October-ni 7 tariko UK a·songo donggipa Women of North East Support Network (WNESN) aro London-ni Nehru Centre nangrimenba, exhibition-ko ong·atangaha.
Ia WNESN-ko 2020 bilsio sajinmani giproroengmiting somoio dingtangmancha salgro salaramni me·chikrang, saksa sakgipinko nirok sandina aro pilakni gitan janggi tanganio chu·sokaniko ra·bana miksonge bikotahachim.
WNESN-ni ku·wattimgipa Afifa Fatemi-ni parakatani gitade, ia exhibition-ko ong·atanio damchet salgro salaram a·dokrangni dakani rikanirangko mesokangan baksana dingtang dingtang jatni chrok mesaani aro ring·anirang, jekai Assam-ni Bihu chrokani, Sattriya Nritya chrokani, Meghalaya-ni U Sier Lapalang, Manipur-ni Krishna Dance, Mizoram-ni Khuangchawi Thla aro uandakgipa chrokanirangkoba nikna gita man·aha.
Ia program-ko ong·atanio India-ni High Commissioner Vikram Doraiswami aro Nehru Centre-ni Deputy Director Sanjay K Sharma, mongsonggipa sokgiparang ong·e bakko ra·angaha.
