Tura, Jun 12: Nasha Mukt Bharat Abhiyan (NMBA) campaign-ni bak gita Sukrobar salo, West Garo Hills a·jani District Social Welfare Department, Tura Music Academy baksa nangrime, Inter School Group Singing Competition-ko Tura-ni Walbakgre-o donggipa Pastoral Centre-o ong·ataha.
Ia singing competition ba git ring·susaaniko ong·atanio, dingtang dingtang skulni chatro chatrirang, pekatgipa samrangoni jakgitel ong·gipa songsalko ong·atna aro pekatgipa samrangni kosako jegalaniko mesokna gita ku·cholsan bak ra·angtokaha.
Ia git ring·susaaniko ong·ataniara, pekatgipa samrangko jakkalanio namgijaniko mikrakatna chol on·an baksana an·tangtangni changa sapanirangko mesokna gita chatro chatrirangna namgipa cholrangko on·anina ong·aha.
Ia Inter School Group Singing Competition-ko ong·atanio, School Education & Literacy-ni gitcham Additional Director Charlotte W Momin, mongsonggipa sokgipa ong·e bak ra·angaha aro unbaksana Kilkra Kids School, Managing Committee-ni President John D Shira, West Garo Hills a·jani District Social Welfare Officer Madonna T Sangma aro gipinrangba dongpae bak ra·angaha.
Ia Inter School Group Singing Competition-o Tura-ni Phoenix Rising Academy, skanggipa ong·e, gong 8000 tangkako boksis dake man·angaha, uni ja·man Tura-ni Kilkra Kids School, gnigipa ong·skae, gong 6000 tangkako boksis man·angaha aro Tura-ni Learning Sanctuary School, gittamgipa biapko man·e, gong 4000 tangkako boksis dake man·angskaaha. Ia git ring·susaanio chegiparangna aro bak ra·giparang pilaknan certificate-rangkoba on·angaha.
Ia Inter School Group Singing Competition-ko Dr Aksha N Sangma sokachakaha aro ia git ring·susaaniko, Tura Music Academy-ni skigiparang, chong·motan Tesrang G Momin, Aaron A Sangma aro Cheringra Ch Marak, judge ong·e niangskaaha.
Ia program-ko Tura Music Academy-ni Director Tengrang R Sangma aro academy-o kam ka·giparangni dilanichi, nambee chu·sokgipa ong·atna man·aha.
Na·simang iakoba nina man·gen:
Na·simang iakoba poraina man·gen: Shantiniketan Medical College-o saksa me•chik kae sia
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
