Shillong, April 6: Re•anggipa April-ni 2 tariko Kristianrangni Palm Sunday-ko maniengmiting somoio, Vishva Hindu Parishad (VHP) dolni Shillong songjinmao chrik a•boke re•jomaniko ong•ataniara Kristianrangni tom•tome olakkianiko golmal ka•ani gita ong•aha ine Khasi Students Union (KSU) Laban circle, suk ong•gijaniko parakataha.
KSU-ni parakatani gitade, ua salo VHP-ni manderang, Red Cross gita aro Laban-oni Laban Iewdak-ona re•jomangenba salni 1:00 bajimango, Laban Presbyterian gilja noko manderangni olakkiengmiting somoio, gilja nok a•palon minute 10-mangna chrik a•bokanirangko dakahachim aro iani Kristianrangni olakkianiko golmal ka•na aro Kristianrangni kosako kenataniko ra•bana jotton ka•ani gita ong•ahachim.
Iakoba poraie nina man·gen: VVP, Roster System-ni bidingo chanchirimna gita Special Session-ko ong·atchina mol·mole skotong minister-na chittiko on·anga
Laban Presbyterian gilja noko olakkigiparangko golmal ka•ani ja•man ia manderang, St John Parish-onaba apsan daken golmal ka•na re•jomangengachim indiba ua somoio manderangni didianiko man•e police-rang, ia manderangko Madan Laban-o donggipa St John Parish-onade napangna on•jaha aro ja•mano ia manderang, Laststop-chipakna re•angskaaha ine KSU-ni dilgiparang parakataha.
Ram Navami-ko India a•song gimikon March-ni 30 tarikosa manitokahachim ine janapatengon, maini gimin Shillong songjinmao ia salko April-ni 2 tariko Kristianrangni Palm Sunday-ko maniengmiting somoiosa maniskae, manderangni olakkianiko golmal ka•na nangaha ine KSU-ni dilgiparang sing•doataha.
April-ni 7 tariko Good Friday aro April-ni 9 tariko Easter Sunday-ko maniengani gimin ia salrangode iandake jinma re•jomanirangko ong•atna on•jachina gitaba KSU-ni dilgiparang, a•dok sorkari aro district administration-ko didiataha.
