Tura, Nov 2: West Garo Hills a·jani Selsella Police Outpost ning·o donggipa Mandagre songni me·chik saksa, an·tangko rim·sruka, drae til·eka, ka·mikkenate roa aro gipin toromko ra·draata ine gipin jat me·asa saksani kosako FIR ka·doangaha.
Balsera Ch Marak minggipa me·chik saksani Selsella Police Outpost-ni Officer-in-Charge-na FIR ka·doangani gitade, re·anggipa 2024 bilsini December 19 tariko, uni nosto ong·gipa mobile phone-ko tariatna ine uni Rajabala Bazar-ona re·angani somoio ua Rofiqul Islam minggipa mande saksako grongchengaha indiba ja·mano ia mande, una phone ka·atjringenba, uko dokkol ka·e rona aro ka·mikkenatna a·bachengaha.
Uni phone-ko ra·chakja ong·ode uni ma·a paako so·ote galgen ine ka·mikkenatahani gimin ua ia me·asani phone ka·atarangko ra·chakna draatako man·aha ineba ia me·chik, FIR-o janapaha.
January 1 tariko, uko Mandagre ramao grongna aganatani gimin ua ramaona re·angon, Rofiqul Islam an·tangni ripengskarang baksa gari gipoko re·bae, uko Rajabala-ona rim·draangaha aro uano uko ua drae til·ekaha ineba Balsera Ch Marak, FIR-o parakaha.
Uni ja·man January-ni 6 tariko ia mande uko Assam a·dokni Mankachar-ona rimangenba Kristianoni Muslim toromko ra·draataha aro uni bimingko Balsera Ch Marak-oni Taniya Begum ine seskaaha ineba ua FIR-o janapaha. Muslim toromko ra·draate biming dingtangatani ja·man ua me·asa uko, Hat Singimari Court-o bia ka·draataha aro ua bia ka·na jechakon, uko ka·saninggija dake dokaha ine Balsera, FIR-o janapaha.
Iandake antisamangna rim·e donani ja·man uko Rajabala-ona rimbapilaha aro unoba ua me·asa uko a·palchi ong·katna on·gija aro uni nokdang baksa golpona on·gija kal·ake rokuaha ine FIR-o janapaha.
August jao, Rajabala-o mande saksako jinma doke so·otanio ia mandeba jak dongpaani ja·man ua, ua biaponi joke katna man·aha aro Tura Women Police Station-o badi ka·ena man·aha indiba ia mande, uni police-rango badi ka·aniko ra·pilchina gita uko ka·mikkenataha ine ia me·chik, FIR-o parakaha.
Ia bilsini October jaoba ia mande, ia me·chikni jonggipako Rajabala Bazar-o chu pekatenba rim·e donaha aro ua unona re·angpilkujaskal uni jonggipako watpilna gita jechakaha ineba FIR-o janapaha.
October-ni 22 tariko ua bon·kame ua mandeoni joke katbana man·piltaiahba aro ia changode, uni ka·mikkenatanirangna bame on·jana gita ua tik ka·aha ine Balsera Ch Marak, FIR-o parakaha.
Na·simang iakoba nina man·gen:
Na·simang iakoba poraina man·gen: 2-gipa West Garo Hills Inter Club Taekwondo Championship-o B P Inspire School chegipa ong·anga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
