Tura, Jan 15: Tura songjinmani bijangchio donggipa William Point a·dam jekon Meghalaya a·dokni skanggipa Skotong Minister aro GHADC-ni CEM ong·chenggipa Captain Williamson A. Sangma ko gisik ra·na gita uni mangkrongko tarie donenggipa sambengo dongachim, uno dingtang dingtang tom·bimonganirangko, jegalanirangko dakna ba ong·atna gita da·ode Garo Hills Autonomous Distrct Council (GHADC) oniko No Objection Certificate (NOC) ba ong·chakatna bil on·aniko ra·chengna nanggen ine parakataha.

GHADC, Secretary Ma Rikse R. Marak-ni parakata gitade, batanggimin salrangonin bang·a dingtangdingtang NGO-rang, songsalna kam ka·giparang aro skulni skigiparang William Point-o GHADC-ni bil on·aniko ra·changgija dingtangdingtang programrangko aro jegale jinma tom·anirangko ong·atrongbaenga. Ia obostarangko GHADC-ko da·o nirokenggipana u·iatengon mikkangchide indakgipa programrangko ba jinma tom·anirangko ong·atna manchisoode skanggipa GHADC-ni bil on·aniko am·chengna nanggen ine aganaha.

Tura-ni William Point-ara GHADC-ni ning·o ong·ani gimin uko uamangan nirok simsakenga aro nitoatanirangko dakenga, uni gimin darang NGO-rang, songsalna kam ka·giparang aro skulni skigipa dolrang GHADC-ni bil on·ako man·chenggijade William Point-o dingtangdingtang program aro tom·anirangko ong·atna man·jawa ine parakataha.