Williamnagar, Oct 2 : Garo Hills Chess Association ni dakchakpaanio East Garo Hills ni District Sports Office aro District Administration ni nangdime ong⋅atgipa “Williamnagar Open Chess Tournament” October ni 2 tariko matchotahaon gimik gimang sak 47 manderang bakko ra⋅angaha. Susaani bon·kamgipa salo East Garo Hills a⋅jani Deputy Commissioner Pa Swapnil Tembe mongsonggipa sokgipa ong⋅e jinmana aganengon ‘ia chess kal⋅susaaniko dingtangmancha chonchongipa bi·sarangni gisikko chess kal·aniona salbakna miksonganio ong⋅ataha aro mikkangchi uamangna uko kal·ani bidingo u·i ma·sigipa rangchi skie on·ate kal·susaanirangko ong·ate bakko ra⋅atgen’ ine janapaha.

Ia Williamnagar Open Chess Tournament-o chegipa ong·e Te. Silkam Sangma tangka gong hajal 20 aro trophy ko man·ahaon Barbith Sangma gnigipa ong·e tangka gong hajal 10 aro trophy-ko man·skaaha. Uamangna boksis rangko East Garo Hills ni Deputy Commissioner ni jakchi on⋅angaha. Ia susaanio me·chik rangoni saksakamkam bakko ra⋅gipa Patricia Momin-na Garo Hills Chess Association ni Padot Pa Wilseng G. Marak ni jakchi boksis ko on⋅angskaaha. Susaanio bilsi chonbatgipa Arano Rikkrim Momin na Most Promising Player boksisko susaa gimiko kal·anirangko nirokgipa Pa Tarzan Sangma ni jakchi on⋅angaha.Kal·susaa matchotani ja·mano chegipa Te. Silkam Sangma-ko Hub News kobor ra·timgipani sing·on ua ia susaanio chegipa ong⋅e bilongen kusi ong⋅a ine aganenba ian uni gnigipa changna Williamnagar chess kal·anio bako ra⋅ani ongenga ine parakaha. Meghalaya a⋅dokoba da·ode chess kal·anio A⋅chikrangan nambatenga aro mikkangchi nambate dakangna jotton ka·dapgen ineba agankuaha.Garo Hills Chess Association ni Padot Pa Wilseng G. Marak-ko Garo Hills-o Chess kal·giparangni gimin sing·on, Garo Hills-ni songantion Chess kal·giparangde dongaia maina batanggimin somoio Chess Kalsusaaniko Tura-o ong⋅ato sak ritchagni manderangna bate bakko ra⋅aha aro indake chess kal·susaanirangko mikkangchi ong·atgenchimode kal·giparang bang⋅en ong·katdapgen aro Garo Hills-na nama bimungko ra⋅bagen ine an·tangni ka⋅donganiko parakataha.

Bon·kamao , mitelpilskaani kattarangko East Garo Hills ni Dsitrict Sports Officer Ma. Babira G. Momin agane ia bilsini Williamnagar Open Chess Tournament kal·susaaniko do·ga chipaha.