Williamnagar, Jan 19: Rajabala jolo donggipa Goalgaon songo, so•ota man•gipa Dilseng M Sangma-na kakket bichalko dabie Sombar salo, East Garo Hills a•jani dingtang dingtang dolrang nangrimenba, tom•tome re•jomaniko Williamnagar-o ong•atangaha.
Ia re•jomaniko Garo Students Union (GSU) Eastern Zone, Mother’s Union, GES, AOSW, APA, FKJGP, Pick-Up Association, AHAM, ACHIK, AIGU, Simsanggre Indigenous People’s Forum (SIPF), Auto Association, NGCO, ADIL, AAYF, aro FAF dolrang nangrime ong•ataha aro ia re•jomanio hajal kotok manderang bak ra•angtokaha.
Re•jomna skang jinma tom•bimonganiko Rongrenggre Government Higher Secondary School Basketball Court-o ong•ataha aro ia tom•bimonganiko All India Garo Union (AIGU)-ni dilgipa Taison D Sangma dilangaha.
Ia tom•bimonganio, GSU-Eastern Zone-ni general secretary Alex D Shira, jinmana aganprakengon, ia tom•bimonganiko ong•atani bidingo talate on•angenba, Dilseng M Sangma sagina kakket bichalko dabina ia jinma tom•e re•jomaniko ong•ataha ine parakataha. A•chik jat ku•cholsan ong•na, an•tangtangon pangchakgiparang ong•na, gama ge•anirangko dakna aro namgipa songsalko ong•atna saksa sakgipinna chakpaani somoi ong•aha ineba ua aganaha.
Ia tom•bimonganio, pagiparangoni saksa Trueman M Sangma-ba jinmana aganprakengon, Isol jekai Israel-rangna Canaan-ko pattiaha, apsan daken A•chik jatna Garo Hills-ko pattiaha ine aganenba, gipin jatrango pangchakna nangjana gita an•tangtangan bading chiwalanirangko aro gama ge•anirangko dake cha•china didiangaha.
‘Ama aro Aman’ a•songde salgina bateba nambata’ ine toe agananiko janapangengon, Garo Hills-ko ‘gnigipa Tripura’ ong•na skango kenchaksoanirang da•o chu•sokbaroroengaha ine Garo Hills-o napsruke songdong a•chaaniko champengna nangengani gimin Sangma janapangaha.
Ia tom•anio, Vice Chairman of State Women’s Commission-ni saksa gitcham dilgipa aro Educere Secondary School-ni Principal Gamchi Timre R Marak-ba jinmana aganprakengon, Dilseng M Sangma-ko ka•saninggija dake so•ote galanina raken jegalangenba, iandakgipa tom•bimonganirango bak ra•china gita jolo songdongenggipa manderangko didiangaha. Iandakgipa tom•e re•jomanirangko chatro chatrirangsa dilrongbata ine an•tangni suk ong•gijaniko parakatengon, lekka porana dongimin niam gitade, iandakgipa jegale tom•bimonganirango chatro chatrirangkode bak ra•pana on•jachim ine Marak, chatro chatrirangni dilanio tom•tome re•jomchina didiangenba, ka•a ding•chaoanichi ba skatang chanchigija dakanichi namgijako ra•baani cholrang donga ine mikrakataniko on•angaha.
Ia tom•anio, Simsanggre Indigenous People’s Forum-ni president Arun Marak-ba jinmana aganprakengon, re•anggipa January-ni 13 tariko uni noko dingtang dingtang dolrangni tom•e chanchirimanirangko jinmana talate on•angaha.
Ia tom•bimonganiko ong•atanio, Bolkinggre Baptist Mondolini Pamong Traistor D Shira, duko ga•akenggipa nokdangna an•tangni kalimpaaniko on•angenba, Goalgaon songo ong•gipa a•selara Garo Hills-ni manderangna dukniko aro ding•chaoaniko ra•baaha aro ian mikkangchina mikrakataniba ong•aha ine aganaha.
Jinma tom•bimongani matchotani ja•man, Rongrenggre Govt HS School Basketball Court-oni, Soil Lake, Williamnagar Main Market aro Deputy Commissioner (DC) office-ona re•jomange, ja•mano apsan biaponan re•jombae matchotataha.
Ia tom•ani aro jinma re•jomaniko ong•atanio, Williamnagar-o donggipa pilak dokkanrangkon, sianggipa mandena kalimpaani chin gita aro kakket bichalna dabianio bak on•pae, chipe dontokaha.
Na·simang iakoba nina man·gen:
Na·simang iakoba poraina man·gen: Kaziranga-o biapni gimin meligrikgijani a·sel ja 5-ni gisepo matcharangni sia mang 3 gapa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
