Williamnagar, Oct 26: Changdokgipa Captain Williamson Sangma Memorial Football Tournament-ko Sonibar salo, Baghmara Govt Higher Secondary School kal·chakramo a·bachengataha aro ia kal·susaaniko a·bachengatanio, Shillong-ni Langsning Football Club aro Garo Hills United Football Club dolrangni gisepo kal·susaangaha.
Ia tournament-ko a·bachengatanio, dingtangmancha ia jolrango robol kal·na changgipa sapgiparangko mesokna aro South Garo Hills a·jani chadamberangko, kal·susaanio gisik nangchina didina gita exhibition match-koba ong·atangaha.
Ia robol kal·susaaniko a·bachengatanio, Meghalaya a·dokni Cabinet Minister Marcuise N Marak, mongsonggipa sokgipa ong·e bak ra·angaha aro unbaksana Rongara-Siju MLA Rakkam A Sangma, South Garo Hills a·jani Deputy Commissioner Sumit Kumar Singh, SP Shailendra Bamania aro dingtang dingtang officer-rangba dongpae bak ra·angtokaha.
Ia kal·susaaniko a·bachengataniona sokbagiparangko Wangala chrokgipa dol rimchaksoaha aro uni ja·man United Baptist Higher Secondary School-ni chatro chatrirang, a·dokni ring·aniko ring·aha. Ia kal·susaaniko a·bachengatanio, Mangsang-Am·pang Mahari Choir-ba gitko ring·e manderangko an·saoatangaha.
Ia tom·anio a·dokni Cabinet Minister Marcuise N Marak, jinmana aganprakengon, ia salara, Meghalaya a·dokko man·e on·dilgipa Captain Williamson A Sangma-ni chang 35-gipa siani salba ong·ani gimin gisik ra·beani sal ong·enga ine parakataha. A·chikrangni gunko rakkina aro jatni gisepo ku·mong nangrimaniko ra·bana gita Capt Sangma-ni on·gilanirangko janapangengon, ia Captain Williamson Sangma Memorial Football Tournament-ko bilsiantian ong·atengani gimin Rongara-Siju-ni MLA Rakkam A Sangma-ko mittelpilangaha.
Ia tom·anio South Garo Hills a·jani Deputy Commissioner Sumit Kumar Singh-ba aganprakengon, Captain Williamson Sangma-ko gisik ra·na gita iandakgipa robol kal·susaaniko ong·atan baksana Shillong aro Garo Hills gimikni robol kal·giparangko apsan ong·e rimbaaniara Capt Sangma-na kragipa mande ra·pilanian ong·enga ine aganaha.
Langsning Football Club aro Garo Hills United Football Club dolrangni robol kal·susaanio, Garo Hills United, goal-sako chipchengna man·ahachim indiba ja·mano Langsning Football Club, bilakbee kal·enba, goal-gniko chipe, Garo Hills United Football Club-ko goal 2-1-chi cheangaha.
Ia football tournament-ko ong·atani bidingo, Prosper S Marak, Hub News-na talate on·angengon, ia kal·susaanio 2018 bilsionin Rongara-Siju MLA aro a·dokni gitcham Cabinet Minister Rakkam A Sangma-ni dilanichi aro tangka paisa dakchake on·anichi ong·atenga ine parakataha. Ia chang robol kal·susaanio gimik dol 32 robol kal·giparang bak ra·enga ineba Marak parakataha.
Na·simang iakoba nina man·gen:
Na·simang iakoba poraina man·gen: Arunachal-o ULFA(I) bobil dolni saksako rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
