Shillong, March 10: A·doko cho·gimin lak 3 Metric Tonne (MT) koelarangko a·dok sorkari dakiangaha, jeonikon gong kror 70 kajinarangko a·doko ong·katatna man·aha ine a·dokni skotong minister Pa Conrad Sangma, da·omiting Assembly-o budget-na tom·enggipao Butbar salo u·iataha.
A·dokni Governor-ni aganprakanio agan-jera-ra·grikanina aganchakengon, “Batanggimin adita bilsirango je kamrangkon ka·angahachim gimikkon niam gita dakataha. A·dokni lak 3 MT-mang ong·gipa koelarangko dakiangaha aro gong kror 70 kajinarangko a·doko ong·katatna man·aha. Niam gri koela cho·ani mamlarango nangchape chu·gimik ming 250 case-rangko segataha. Niamko pe·e koela cho·aniko daksrukani kamrango nangchape mija bilsioni dipet MMDR niamko ra·gatangaha,” ine Pa Sangma agan-talataha.
Skotong minister indakeba aganangkuaha, “East Jaintia Hills-o donggipa koela 54,000 MT -na Coal India-ni dakiatani kamrangoba matchotnasiengaha. Ua koelako brenasigipako chinga ru·utgijan basena man·gnok aro gipin district-rangoba ia apsankon dakanggen.
Koelako dakina gita metric ton prako gong 4,850 ka·e dam tik ka·soe donanikoba NGT namnike ra·chakaha.”
A·doko koela cho·ani aro koelani karkanarangko ra·e ong·gija chanchianirang donga gita nika ine janapatengon, indakgipa ong·gija chanchianiko dingtangatna nanggen maina ia karkanaan indita chasongrangna kingking bang·a manderangna koelao pangchake janggi tanganirang cholrangko on·baenggipa ong·a ine aganenba, gitik-gitak koela cho·aniko champengatahaon ua somoioni, bilsi 200-rangna kingking manderangni nikanio namgipa kamara rang·sanan niam gri bading-chiwalani kamsa ong·baskaaha,” ine ua agandapaha.
NGT-ni a·doko koela cho·aniko champengataniko man·adipet ra·galna sorkari on·kange kam ka·enga ine ka·dongataniko on·angtaienba, bilsisa jagittamni gisepon chinga ia champenganiko ra·galpilna man·aha ine skotong minister aganaha. Warachakgipa dol, uamangni ka·gnigipa kamkosa ka·na nanga. Koela cho·ani a·doko maming champengani dongjaha, SC ia champengataniko ra·galpilaha. A·ningni gamko bikotna bhara on·na man·ani gimin gnigipao ja·ku ga·aniko India sorkari aro Meghalaya sorkari ra·chakaha,” ineba Pa Conrad Sangma taldapataha.
