Shillong, March 10: Bangladesh a•songo songdongenggipa A•chikrangko a•rikgalenga ine kobor on•aniko Meghalaya sorkari name am•sandienga ine Budbar salo a•dokni Chief Minister Conrad K Sangma parakataha.
Bangladesh a•songo chengoni songdong a•chaenggipa A•chikrangko Bangladesh sorkari a•rikgalna jotton ka•enga ine songbadrango segipani bidingo Congress dolni MLA PT Sawkmie-ni Assembly-o sing•anina aganchakaniko on•angengon, ian Bangladesh a•songosa ong•engani gimin da•o dipet a•dok sorkari mamingkoba dakna man•jawa indiba sorkari obostarangko name nienga aro Garo Hills-o maming so•sojengjeng ong•anirang dongjana gita sorkari ja•kuko de•enga ine Chief Minister parakataha.
Chief Minister-ni parakatani gitade, A•chikrangni songdong a•chaenggipa Bangladesh a•songni Modhupur buring jolrangko Bangladesh sorkarini a•asa ine a•kange ia biapo Eco Park-ko kulina miksongengon, Modhupur-o songdongenggipa A•chikrangba chengonin ia biapko pagitcham ma•gitchamrangoniko man•rikrikbagipa biapsa ine a•kangskaengachim.
“Ia biapko wate re•angchina gita Bangladesh sorkari ge•etaniko on•a intalan ia buring jolo songdongenggipa Tribal-rang, antigni batpile jegalanirangko dakskaengaha aro Garo Hills-oni Garoland State Movement Committee (GSMC) dolba, Bangladesh a•songni Modhupur a•jao songdongenggipa A•chikrang baksa nangrime, Bangladesh sorkarini ning•o donggipa Forest department-ni on•gipa ge•etaniko ra•pilchina dabienga,” ine Chief Minister aganaha.
Iani bidingo GSMC-ni membor-rang, re•anggipa February-ni 9 tariko West Garo Hills Deputy Commissioner-ni office mikkango tom•tome jegalanirangko dakangenba ja•mano DC-ni jako Chief Minister-naba memorandum-ko on•atahachim.
Indake ong•engon, ia obostani bidingo India sorkari gita Bangladesh a•song baksa agangrike, Bangladesh a•songo songdongenggipa A•chikrangni neng•nikanirangko niatna nanggen ine Chief Minister, Assembly-o parakataha.
