Shillong, Sept 22: Meghalaya aro Assam a•dokni simarango meligrikgijaniko namatna gita a•dok damgnini sorkarirang ja•kuko de•chakatengon, kamrangko ka•dilna gita regional committee-rangko songanio Khasi Hills Autonomous District Council (KHADC)-ni membor-rangkode rimnapjaha ine KHADC-ni Chief Executive Membor (CEM) Titosstar Chyne, Meghalaya sorkarini kamna suk ong•gijaniko parakataha.
Simarango songdongenggipa manderang baksa agangrike report-ko on•china gita adita salrangna skangsan Meghalaya sorkari, Cabinet Minister-rangni dilanichi regional committee-rangko songahachim.
KHADC CEM-ni parakatani gitade, a•bachengode iani bidingo tom•anirango Autonomous District Council (ADC)-rangba bak ong•parongachim indiba adita salrangna skang ong•attaigipa tom•aniode ADC-rangko okamjahachim.
Meghalaya a•dokni ning•o donggipa biaprangni bidingo see rakkigimin lekkarang district council-rangosa ong•ani gimin simarango meligrikgijaniko namatanio ADC-rangba mongsonggipa bak ong•na nangachim ine Chyne parakataha.
Lekkarangko tarina gita a•bachengode sorkari, District Council-ni dilgiparangko aganahachim aro uamang kamrangko matchotna siengahachim ineba Chyne aganaha.