Guwahati, January 02: Sombar salo, AIUDF-ni MLA Aminul Islam, Union Budget, Assam-ni Skotong Minister Himanta Biswa Sarma, aro electoral roll-rangni bidingo ong•enggipa Special Intensive Revision-ni (SIR)kosako raken jegalanirangko dakenba, India-Pakistan-ni cricket kal•suaani bidingo an•tangni chanchianiko parakatangaha.
“Union Budget India-ni chadamberangni dabianirangko chu•sokatna man•jaha. Janggi tangani cholrangko man•na neng•nikaniko namatna mamung cholko on•jaha. A•song gimiko janggi tangani cholrangna neng•nikaniko namatjagenchimode, adita ritcha ba hajal chadamberangsan namgniko man•ainaba gnang aro million manderangni ka•donganirang aro niksamsoanirang chu•sokjawa,” ine Islam, Hatigaon, Guwahati-o donggipa AIUDF party office-oni kobor ra•timgiparangna aganangaha.
Uandake, Islam Assam-ni Skotong Minister Himanta Biswa Sarma-ni kosakoba adita matnanganirangko dakangaha. “Re•anggipa adita salrangni gisepo, Assam-ni Skotong Minister niam gri skatang parakatanirangko dakenga. Ua Muslim-rangni kosako matnange agananirangko dake, kenani aro jajrenganirangko ra•baenga,” ine ua aganangaha.
“India-ni niam bidiko bil man•gipa Skotong Minister-de indakgipa agananirangko dakna nangja. Rickshaw salgiparangna tangkarangko chu•onggija gamchina manderangko agananirangara namen kragijani ong•a,” ine ua aganangkuaha.
“A•doko tom•tomaniko rakkina Skotong Minister-ko National Security Act-ni ning•ao sasti on•na nanga. Ong•jaode, iandakgipa kattarang Hindurang aro Muslimrangni gisepo kajia-golmalrangko ong•atnaba gnang,” ine Islam dabiangaha.
Electoral roll-rangni bidingo Special Intensive Revision-ko (SIR) dakani bidingo janapon, West Bengal-ni Skotong Minister Mamata Banerjee-ni Delhio jegalanirangko dakanina ua chu•gimik chakrimpa•enga ine aganangaha.
“SIR-ko ka•anio meligijanirang aro dingtanganirangara namen neng•nikaniko on•gipa obosta ong•a. Assam-oba iarangko dakani a•selan manderang neng•nikaniko man•enga. Bang•a ong•gija jegalanirangko dakmanaha,” ine ua parakataha.
“Assam-ni voter list-oni lak bri-bonga Muslim-rangni bimungrangko den•galaniko man•naba gnang. Ia obostani bidingo janapanirangko dakaha, aro chinga uni kosako jegalanirangko dakanio chu•gimikan chakrimpaa. Chinga India-ni President-naba memorandum-ko on•ataha,” ine Islam agandapaha.
India-Pakistan-ni gisepo kal•susaanirangko janapon, sports aro politics-ko brinna nangja inenba, kal•susagiparangko politics-ni kajiao nangatena nangja, maina bang•a somoion politics-de mitchigrikaniko ra•baa ine ua talatangaha.
“Kal•susagiparangko saksa sakgipin baksa susaaoni champenganiara nama ong•ja. Kal•susaanirangde politics-ni kajiarangni kosako dongna nanga,” ine ua bon•kame aganangaha.
