Shillong, Feb 2: Da•o dipet Meghalaya a•doko Nipah Virus-ko man•giparang dongkujaengoba, sabisi sakanchiko warachakna gita a•dok sorkari, mikraken kamrangko ka•soenga ine Sombar salo, a•dokni Sports aro Health Minister Wailadmiki Shylla parakataha.
West Bengal a•doko Nipah virus-ko man•aha ine koborrangko man•soenggipani bidingo sing•anina aganchakaniko on•angengon, da•o dipet Meghalaya a•dokode Nipah Virus-ko man•ani maming sakki ba report-rangba dongkuja indiba a•dok sorkari, Health department-ko mikrake kam ka•sochina u•iataha ine Shylla aganaha.
Manderangni gisepo kenjagokaniko ra•bana sorkari nangnikjaenga ine janapatengon, sabisiko warachakna gita Health department, mikraken kamrangko ka•soenga ine Health Minister aganaha.
Re•baenggipa 2027 bilsio chang 39-gipa National Games-ko Meghalaya a•doko sokachakna tarisamsoenggipani bidingo janapatskaengon, National Games-ko sokachakanio kamrangko ka•sona gita Meghalaya sorkari, ma•mong sorkarioniko tangka paisarangko bi•dapataha ine Shylla parakataha.
National Games-ko sokachakna gita ma•mong sorkarini dakchakanirangko bi•atan baksana a•dok sorkarini gitaba kamrangko ka•soenga ineba ua aganaha.
National Games-ko sokachakanio badita korosko nanggen, da•o dipet gipin department-rang baksa chanchirima dongkujaengani gimin aganna man•kujawa ineba Sports Minister talataniko on•angaha.
Ia bilsina ma•mong sorkarini parakatgipa budget-ni bidingo janapatskaengon, ia bilsini budget-ara, Meghalaya aro salgro salaram a•dokrangna bang•en namgnirang donga ine Shylla aganaha.
