Shillong, Oct 11: Meghalaya a•doko BJP dolni dilgipa AL Hek-koba BJP National Executive Committee-o rimnapaha aro ia committee-o an•tangko rimnapani ja•man kobor ra•timgiparang baksa agangrikengon, a•doko BJP-ko bilakbatatna aro BJP-ni membor-rang doltangko wate katjana gita ua kam ka•gen ine parakataha.
2023 bilsio BJP, sorkariko rikna man•gen ineba Hek, an•tangni ka•dongchakenganiko parakataha.
BJP-ni national executive committee-o a•songni Prime Minister Narendra Modi, LK Advani, Dr Murli Manohar Joshi, Union minister Rajnath Singh, sakgipin Union minister Nitin Gadkari, Rajya Sabha-ni dilgipa aro Union Minister Piyush Goyal aro national office bearer-rangko man•chape gimik sak 80 membor-rang gnangchim.
Ia national committee-o dingtang dingtang a•dokni chief minister-rang, deputy chief minister-rang, assembly aro council-ni party dilgiparang, gitcham chief minister-rang, gitcham deputy chief minister-rang, national spokesperson-rang, national morcha president-rang, state general secretary-rang aro gipinrangko man•chape sak 50 special invitee aro sak 179 permament invitee (ex officio)-rangba donga.
