Guwahati, Aug 31: Kosakbatao donggipa Arunachal Pradesh a·doko mikka-chimarang kraa gitan waanganichi Assam a·doko chi-bana ong·eskaani obostarang namjabatroroaniko nikna gita man·engon, a·dokoni dam 22 a·jarangko chichi mriptokahanio da·odipet lak 3.41 manderang ia obostao neng·nikanirangko chagrongtokenga ine koborna parakataha.
Assam a·doko chi-bana ong·anichi da·odipet sak 15 manderang siangaha aro ia obostachi Barpeta, Biswanath, Chirang, Darrang, Dhemaji, Dhubri, Dibrugarh, Goalpara, Golaghat, Jorhat, Kamrup, Kamrup Metropolitan, Kokrajhar, Lakhimpur, Majuli, Morigaon, Nagaon, Nalbari, Sivasagar, Sonitpur, Tamulpur aro Udalguri a·jarangoni gimik-gimang sak lak 3,40,937 manderang da·omiting neng·nikanirangko chagrongtokenga.
Koboro parakatani gita, mija Mongolbar salona kingking bang·ata manderang neng·nikanio ga·ake namjabatgipa obostako chagronganggipa Lakhimpur a·jao chirang da·ode aditan rokangpilaniko nikna man·aha. Uandake, Assam State Disaster Management Authority (ASDMA)-ni parakatani gita, Majuli aro Morigaon a·jarango Brahmaputra chibimani dal·anichi chi-bana ong·anirang gipin a·jarangona bate bilongbatangskaaha.
Batanggimin bilsirango gitan ia bilsioba Assam a·doko chi-bana ong·aniara, Arunachal Pradesh-o batanggimin anti-gnirango warongbewalna bate 228.5 mm mikkarang jimbate waanganichi Assam-ni Brahmaputra valley-o chibimarang ditdoe dal·baskaahani a·selsa ong·aha ine India Meteorological Department (IMD), u·iatangaha.
Indake ong·engon, Dhubri, Goalpara, Guwahati, Tezpur, aro Nematighat jolrango da·omangba Brahmaputra chibimani dal·anirang namen jajrenggnio ong·engpiti ine Central Water Commission parakataha.
Iakoba poraie nina man·gen: Employment policy-ko ra•gatchina dabie HNYM re•joma
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
