Itanagar, Feb 23: Ru·uta bilsirangoni Assam aro Arunachal Pradesh-ni sima kajia-golmalrang ong·enganiko namatna inenba Robibar salo Pakke-Kesang a·jao donggipa Sejiosa minggipa biapo sima arini skanggipa krongko songaha.
Ian India-ni Salgro Salaram-o sima arini bidingo kajia-golmal ong·anirangoni ru·utbatgipa ong·enga aro ia krongko songe on·aniara uko namatna a·dok damgnini sorkarirangni kam ka·anirangoni chu·sokaniko mesoka. Uandake, ian kajia-golal ong·gipa biaprango nangrimani aro tom·tomaniko ra·baani rama ong·naba gnang ine ka·dongsoenga.
July 2022 bilsio Namsai Declaration-ko soi ka·anio, sima arini kajia-golmalrangko namatna re·mikkangani ramako janapaha. Unoni dipet, a·dok damgnini minister-rang aro senior official-rang joint regional committee dolsako bikote kajia-golmal ong·gipa biaprangona re·e niaha, itihas-o see rakkigiminrangko niaha aro songni-nokni manderang baksa agangrikanirangko dake, namatani cholrangko sandiangaha.
Ia Sejiosa krongko songe on·aniara dal·begipa chu·sokani ong·a ine Arunachal Pradesh-ni Skotong Minister Pema Khandu aganangaha. Indake dakaniara sima ari jolrango songdonggipa manderangni ru·uta bilsirangna so·sojengjeng ong·e dongaoni da·o tom·tomaniko ra·baaniko mesoka ine ua aganangaha.
Una agreba, Sejiosa krongara, a·dok damgnini biaprangko ma·ekanirangko dakna nangkuenggiparangko matchotatna, a·dokrangni gisepo ku·mongrimani aro meli-nangrimaniko bilakbatatna, namroro-silroroaniko ra·bana aro sima ari jolo songdonggipa manderangna ka·donganiko on·na ramako mesokani ong·a ine Khandu aganangaha.
Ia krongko songaniko a·dok damgnini dilgiparang namedake niroke songe on·angaha. Arunachal Pradesh-ni Pakke-Kesang a·jani aro Assam-ni Biswanath a·jani Deputy Commissioner-rang, dal·dalgipa police official-rang, dingtangtang jatrangni dilgiparang aro songni-nokni dilgiparangba ia krong songaniona re·bae bak ra·angaha.
Na·simang iakoba nina man·gen:
Na·simang iakoba poraina man·gen: B’desh-o tourist visa on•aniko a•bachengpiltaia
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
