Guwahati, March 24: Assam sorkari aro India sorkari baksa March 15, 2026-o Memorandum of Settlement-ko soi ka·ani ja·mano Kuki Suspension of Operations (SoO) dolrang an·tangtangni silchidarerangko pakwate on·angaha, uandake a·doko pangkamgipa tom·tomaniko ra·bana mongsonggipa ja·kuko de·anio chu·sokangaha.
Ia dolrang – Kuki Revolutionary Army (KRA), United Kuki Defence Army (UKDA) aro Kuki Liberation Army (KLA/KLO), tom·tomaniko ra·bana, agangrikanirangko dakna, aro pilakna silroro-namroroaniko ra·bana krenge kamrangko ka·ahanina a·dok aro ma·mong sorkarirangko mitele aganangaha.
Ia rai-ko ra·chakgrikaniara namen gisik ra·na krabegipa aro dingtanganiko ra·bagipa chu·sokani ong·a inenba, indake dakanchi a·doko ka·donggrikani, kema ka·grikani aro bakrime kam ka·ani gital ramarangko oprakaha, aro kajia-golmal ong·aoni bakrimaniona ra·baaha ine uamang aganangaha.
“Memorandum of Settlement-o janapgimin ge·etanirango pangchake, KRA, UKDA, aro KLA/KLO-ko da·oni dipet bon·atenga,” ine uamang parakataha, aro March 23, 2026-onin uamang baksa pilak bakrimenggipa dolrangkoba bon·ataha ine janapangaha.
Uandake, pilak cadre-rangan an·tangtangni camp-rangko wate noktangtangona re·angchina aro India-ni Niam Bidik-o ge·etanirangko manie songsalo janggi tangchina ge·etaniko on·ataha. Uamangko mandesal baksa janggi tangchina, tom·tomanina aro silroro-namroroanina on·gilchinaba didiangaha.
Ia ra·chakgrikaniko mande ra·china pilak cadre-rang, bakrimgiparang aro dakchakgiparangko mol·molatenba, tom·tomaniko rakkina aro golmal-gondolrangko ong·atjana chu·gimik bakrimanggen ine ra·chakenggipa dolrang aganangaha. Ia gitalgipa re·mikkanganiko bakrimachi, kema ka·achi aro nama chanchianirangchi ra·chakchinaba uamang jinmarangko mol·molangaha.
Ia dolrang, gipin jatrang baksa kajia-golmal ong·atjana gita an·tangtangni dabianirangko komibatataha ine aganaha. Uamangni mongsonggipa dabianirangoni – Karbi Anglong-o Kuki Tribes Autonomous Regional Council-ko bikotna aro Dima Hasao-o dingtangmancha Borial a·jako bikotaniko dontongatchengaha ine uamang aganaha.
Darangkoba watchangjana aro pilakni namnikaniko man·na gita, pilak nanggipa dolrang baksa agangrikanirangko dakani ja·manosa gital MAC seat-rangko bikotna dabianirangko dakanggen ineba uamang aganangaha.
Adita salrangna skang matnanganirangko dakani gimin janapengon, badiaba dolrangni jegalanirang aro matnanganirang uamangni chanchisogijagipa aro uamangko duk man·atgiparang ong·a inenba, gipin development council-rangko bikotani somoio iandakgipa jegalanirang dongja ine saksa dilgipa aganangaha. Indake ong·genchimoba, pilak jatrangni nangnikanirangko nigrikenba, meligrikgijanirang dongjana gita sorkari namgipa bewalko ra·gataha ine uamang aganangaha.
Uandake, uamangni ra·chakgrikanio janapgiminrangko pilakkon chu·gimik aro somoi gita dake on·angchina ine uamang sorkariko didiangaha, aro tom·tomaniko ra·baaniara ia ku·chakgiminrangko chu·sokatanio pangchaka ine talatangaha.
Bon·atenggipa dolrangni bimungo ja·ku de·enggipa dolrang ba manderangna mamung rai-ko on·jawa, aro uamangni kamrangna uamang dosi ra·jawa ineba uamang aganangaha.
Tom·tomani, silroro-namroroani, aro songsalna namgnirangko ra·bana ku·chakenba, ia pilak ja·ku de·anirangchi Assam-ni pilak jatrangna mikkangchina namgnirangko ra·bagen ine Kuki SoO dolrang an·tangtangni ka·donganiko parakataha.
Na·simang iakoba nina man·gen:
Na·simang iakoba poraina man·gen: 100 day “TB Mukt Bharat” campaign-ko Tura-o ong·ata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
