Jowai, Oct 13: Azadi ka Amrit Mahotsav ba India a·songni jakgitelani bilsi 75 gapani aro Legal Service Week-ko maniani bak gita, West Jaintia Hills-ni District Legal Service Authority (DLSA) aro District Sports officer-ni office, Butbar salo rengrengsil ga·susaaniko ong·atangaha.
Salsusaaniko, Ladthadlaboh, Kiang Nangbah Stadium-oni District Sports Officer Pa K. Passah-ni jakchi nisan ripripe a·bachengchakataha jeon sak 45 manderang ia rengrengsil ga·susaanio bakko ra·angtokaha.
Iani bidingo koborna u·iatani gita, a·songni jakgitelanina dakgrikdilgiparangni an·tangtangko on·kanganiko mande sakantina ma·siate on·na aro rengrengsil gaanio be·en-bimangna namgni ong·aniko ma·siate on·na gita miksonge ia salsusaaniko ong·atangaha.
Ia salsusaaniko Kiang Nangbah Stadium-oni a·bachengchakate, Ladthadlaboh Main Road, Newhill, Iawmusiang, Mynthong, Chutwakhu, Mission Compound, Iongpiah, Dulong, Tpep-pale gita nappake salatenba ja·mano Kiang Nangbah Stadium-on matchotateaha.
