Shillong, March 10: India a•songo bank-rangko privatize ka•na ba bading chiwalgipa company-rangni jako pakwate on•na sorkarini manchienganiko jegale da•al Budbar salo Meghalaya a•dokoba bank-o kam ka•giparang, Shillong songjinmani State Bank of India (SBI) main branch-o jingjengatanirangko dakangaha aro re•baenggipa March-ni 15 aro 16 tarikrangode, bank-rango kam ka•enggiparang salgnina kamrangko ka•gija sorkarini kosako jegalanggen ine u•iataha.

Iani bidingo kobor ra•timgiparangna u•iatengon, bank-rangko sorkarini manchienga gita privatize ka•bebegenchimode, bank-o kam ka•giparang bilakbate jingjengatanirangko dakangkugen aro ia manchianiko ra•pilkujaskal dontonggija jingjengatanirangko dakanggen bank-o kam ka•giparang parakataha.