Baghmara, March 10: South Garo Hills a·jani Chokpot Civil Sub Division-ni ning·o dongenggipa manderang an·tangtangni tangkarangko bank-oniko oke jakkalna ta·rake man·jaengani a·sel bang·a neng·nikanirangko man·tokenga ine Butbar salo koborna parakataha.
Chokpot Rural Bank aro SBI Bank-o dongimin tangka-paisarangko oke jakkalna gita namen neng·nikaniko man·tokengani gimin jolni manderang ATM-na dabichina changni-chang didiahani gimin, A·chik Youth Welfare Organisation (AYWO), Chokpot Regional Branch-ni padot Malseng Marak aro uni ka·rimska baksa Mongolbar salo Chokpot SBI branch-ni Manager-ko grongeaha.
Uko grongani ja·man AYWO dilgipani koborna seachi janapatani gita, songni manderang Chokpot bank-oniko an·tangtangni tangka-paisarangko tanggitik nangani somoirango oke jakkalna man·jaengani gimin Chokpot SBI branch-ni Manager-ko grongenba Automated Teller Machine (ATM) ge·sako Chokpot-o songe on·china lekka seachi mol·molangaha.
Chokpot songo ATM ge·sa donggenchimode jolni manderangni neng·nikani komigen aro namen dakchakbeani ong·genchim ine janapatenba, Chokpot-o donggipa ge·gni bank-rangon manderang chakpilgija bang·ani gimin tangkarangko okna re·bae salgimik neng·bee sengdatna nangahaoba basakobade tangka okna man·chipgija jakrara re·angpilna nangronga, indakgipa obostarangko Chokpot jolni manderang chagrongtokengachim ineba AYWO-ni dilgipa koborna seachi janapatjolaha.
