Shillong, Oct 20: Batanggimin adita salrangna skang songsul a·song Bangladesh-o songdongenggipa bang·pagijagipa Hindu jatko ka·saninggija chadrapaniko jegalgrime aro dos dakgiprangko bakbak rim·china dabie Hindu toromna kam ka·enggipa Vishwa Hindu Parishad dolni manderang Shillong songjinmao Butbar salo rally-ko ong·atangaha.

Bike aro scooty-rangko sale rally ong·ataniko Vishwa Hindu Parishad (VHP) dol dakdilangaha jeon dingtang dingtang organisation-rang jekai Bajrang Dal, RSS-ni me·chik dolni manderang jegalanio bakko ra·angtokaha. Bangladesh a·songo songdong-a·chaenggipa Hindu jatko aro olakkiram nokrangko chadrape nosto ka·anirangko Vishva Hindu Parishad (VHP) dol raken jegalatenba, ia ong·enga obostako nirokatchina India sorkariko agane uano songdongenggipa Hindu jatni kosako ka·saninggija daka kamrangoniko naljokatchinaba mol·molataha. Unbaksana, bak dake on·aniara ia mamlao jrip donganisan ong·aija indiba iandakgipa kamrangko dakdil-ka·dilenggiparang baksa jak on·paaniba ong·a ine organisation, Sheikh Hasina-ni sorkariko matnange aganangkuaha.Rally-ko Jhalupara-oni a·bachengate apsan biapona pil·bae matchotatena skang, Anjalee point, Keating road, Butcher lane-ko nappake songsul a·songo ong·anga obostako jegalangtokaha.