Resubelpara, March 5:Bajengdoba Police Station-ni ning·o donggipa Raja A·pal songni bilsi 13 ong·gipa me·a bi·sako songni manderang dokgrime siataha. Ia a·sel-obostara Bristibar attamni 6:30 bajimango Mendal-oni Paikan-ona dakanggipa Dingok bajarni National Highway jolo ong·aha.
Dokako man·e sianggipa bilsi 13-ni dambe me·a bi·sara Mansim G Momin ong·achim, jean Dingok bajaro an·tangni pagipako sengsoengachim.
“Ua, an·tangni ripengska baksa Raja A·pal-oni Dingok-ona motor cycle-o re·ange eleksinna campaign ka·e re·bapilenggipa pagipako sengsomiting somoio indakgipa a·selko chagrongaha” ine North Garo Hills a·jani Superintendent of Police, Pa Abraham T Sangma koborna parakataha.
Koborni gitade, pagipako sengsomiting somoio me·a bi·sa an·tangni ma·sigipa me·chik saksa baksa Dingok bajaro golpoe roengachim, unon songni manderang sanale me·a bi·sako mikbuaha aro uni sambaona re·bae uko kajia-a·bote jegrikna a·bachengaha, bon·kamao me·a bi·sako jinma chadrape go·olrangchi bilongbee doktimolaha.
Uni ripeng adita saknaako man·genchimoba jenten kate jokna man·aha, indiba Mansim, bilongbate saknaako man·ahani gimin uko Bajengdoba Hospital-ona ra·angmitingo rasong gribee rama tong·saon janggi galaha. Indake ong·engon, dos gri me·a bi·sako doke siatgipagiparang songoni kate dongtokenga ine koborna u·iataha.
North Garo Hills a·jao indakgipa kajia golmal ong·anirangko chagrongna nangani a·selara songni manderang an·tangtangan niamko jako ra·bite ka·saninggija rama sorokrango skatang jegrik-dokgrikaniko dakdilani gimin ong·a ineba koborna parakataha.
