Shillong, Feb 10: Garo Hills Autonomous District Council (GHADC)na pu·onaniko ong·atnasienggipana tarisamsoanirangko dakenganio, a·dokni BJP dol eleksino susanasienggipa candidate-rangni skanggipa bimingrangko mikkang March jani skanggipa antion parakatnaba gnang ine ka·dongsoenga. Eleksinni ja·man party-ni chu·sokatna ku·rachake ra·anikoba ia February jani bon·achipakan parakatgen.
A·dokni BJP dolni padot Pa Ernest Mawrie jean da·omiting Garo Hills-on dongkamenba ong·nasienggipa eleksinna pilak tarisamsoanirangko nirokatenga uni aganani gita, da·odipet GHADC-ni dam 18 constituency-rangna dorkasto on·anirangko man·soaha aro skanggipa bimingrangko March-ni skanggipa antion parakatnaba gnang jeni ja·man candidate-rangni gnigipa bimingrangkoba joljolan parakatgen ine agane, eleksinni ja·man party-ni ku·rachakanirangkoba tariengaha aro February ja bon·achipak chinga iako parakatgen, ineba ua agandapaha.
BJP-ni ia eleksinna chanchigni a·baan mongsongbate cha·bokanian ong·gen ine aganengon, GHADC-o kam ka·giparangna dormarangko on·chipgijani aro cha·bokanio nangchapgipa minggipin mamlarangan party-ni chu·sokate on·na ku·rachake ra·ani mongsonggipa ong·anggen ine Pa Mawrie parakataha.
“Cha·bokanian mongsongbatgipa ong·enga, gimik ja 30-rangna kingking kam ka·giparang dormaha gri janggi tangtokna nangaha indide namen dal·bea cha·bokani dongchongmotaha, iakon chinga mongsongbate manderangna ra·baenga, uni gimin uamang mamingo cha·boka grianiko nangnikode aro namroro-silroroaniko mikkango done kam ka·gipako nangnikode uamang, BJP-na pu·onana agre gipin chol dongjawa,” ine Pa Mawrie aganaha.
Gimik dam 29 seat-rango susaangna BJP miksongani gnangma ine sing·anina, “Da·odipetde chinga dam 18 constituency-rangonasan dorkasto on·anirangko man·soengkua aro man·sodapna gita chinga ka·dongsoenga,” ine BJP-ni skotong dilgipa aganchakaha.
Dolni bang·a dilgiparangkon eleksinni bidingo grongjolna miksongenganio, BJP uana gadang-gni dake gronggrikaniko donsoaha indake skanggipa a·bri-a·kong jolko matchotani ja·manosa Garo Hills-ni a·kawe jolchinade somoiko donataha.
Pu·onggnigipana dolni pilak tarisamsoani gimin talatengon, “da·alo chinga a·bri joloni susanasienggipa candidate-rang, District-ni padotrang, Jilani jakrikra, Mandal-ni padotrangko gronge chanchirimaha, salgipino chinga Garo Hills-ni a·kawe joloba tom·aniko ong·ate chanchirimanggen ine Pa Mawrie parakataha.
