Shillong, March 24: BJP dolni chak•paaniko rimchaksoenba, a•songni National People’s Party (NPP)-ni patod aro a•dokni skotong Minister Conrad K Sangma, re•baenggipa Lok Sabha Election-o bakrimpagipa dolrangni NPP-na chak•pana tik ka•aniara chingna nambegipa biterangko on•gen ine sonibar salo parakataha.
East Khasi Hills-ni TMC dolrangni chak•paanikoba man•a ka•dongsoenga ineba Sangma aganangaha.
Lok Sabha Election ong•na siengon NPP, Tura aro Shillong-ni seat-na susaenggipa manderangna BJP-ni chak•paaniko on•aniara uamangna namen dal•begipa ka•dongbatatani ong•aha.
“Gimikni chak•paanian nambegipa ong•a. Darang dolnin ja•pang ba ma•chakani gnang aro darang dolrangan uamangna pu•ona sigipa manderang gnang, uni gimin je dol ba party ba an•tangariba re•bae chingna chak•paaniko on•aniara namen nambegipa ong•a. NPP dol-na chak•paanirang sokbaenganina chinga kusi ong•bea aro ian chingna nambegipa bitekoba man•a dakchakgen” ine kobor ra•timgiparangna Sangma parakataha.
NPP, Tura-ni seat-na da•o ong•enggipa Ma Agatha K Sangma-ko aro Shillong-ni seat-na Ma Amparleen-ko susaaniko dakna seokman•aha.
“NPP-ni Padot, chinga Shillong seat-ko man•a namen krengbee kamrangko ka•enga indake NPP dolna Nongthymmai aro gipin constituency-rangniba chak•paaniko on•enga. Chinga pilak chingna chak•paaniko on•giparangko mitelna namnika, da•o chinga BJP, TMC aro uni dilgiparangni chak•paanikoba man•engaha. Indake ong•genchimoba chingni kam ka•na nanganirang bang•en dongkuenga, chinga pilak kona noksikona re•enba manderang baksa bakrime chingni candidate-na campaign-rangko ka•enga aro ka•angkugen aro chu•sokanikoba man•a ka•songsoenga” ineba aganangaha.
“Chinga agrepile ka•dongpretaniko dakja indiba seat-ko man•rikpiltaina gita chingni bil ama dipet kingkrot kamrangko ka•enga. Na•simangba knamanenggnok anga maming saloba election-ni somoio ka•dongpretaniko dakrongja. Pilak election-an apsan ong•ja, chinga Tura-oba rake kamko ka•na nangenga, aro ia namrenge ra•ani katta ong•ja aro chinga namrengeba ra•ja” ineba ua agandapangkuaha.
NPP-ni Padotko sing•on, ia changni election-o NDA dolrang namen ma•sichakgrike kamrangko ka•enga ine ua aganchakaniko on•angaha. Indake Meghalaya-o NPP, Nagaland-o NDPP, Manipur-o NPF aro Arunachal Pradesh-o BJP ong•skaienga iarang pilakan NDA dolrang ong•a jean ku•mong nangrimanio apsan ong•e susaanirangko dakenga. Sombar salo skotong minister Nagaland-ni skotong minister-ko grongna Nagaland re•anggen.
“Anga aro ang baksa party-ni dilgiparang aro MLA-rang sombar salo, Nagaland-ni skotong minister baksa nangchongmotgipa kamrangni gimin agangolpogrikaniko dakna Nagaland re•anggen. Uan apsandake, chingni dilgiparang aro general secretary James K Sangma maangba da•o Arunachal Pradesh-o ia apsan nangchongmotgipa kamrangko agangolpogrikaniko dakna re•angaha. Anga an•tangba Manipur-ni dilgiparangko Shillong songjinmao pringni bako, re•baenggipa election-ni bidongo adita agangolpogrikanirangko dakaha aro indake NDA-ni candidate-rang chakpaaniko man•china krenge kamrangko chinga ka•enga ine Sangma u•iataha.
Na·simang iakoba poraina man·gen: A·paloni Garo Hills-ona niam gri re·bae wiring ka·aniko AGHTEA champenggen
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
