Baghmara, Jan 21: Meghalaya a•dokko man•e on•dilanggipa aro a•dokni skanggipa Chief Minister Captain Williamson A Sangma sagiko mande ra•pilskaani chin gita Budbar salo, chang 54-gipa Meghalaya Day-ko South Garo Hills a•jani headquarter Baghmara-o maniangaha.
Ia salko manianio a•dokni Chief Minister Conrad K Sangma, mongsonggipa sokgipa ong•e bak ra•angaha aro unbaksana a•dokni Deputy Chief Minister Prestone Tynsong, Education Minister Lahkmen Rymbui, dingtang dingtang dilgiparang, sorkari official-rang aro jolo songdongenggipa manderangba bak ra•angtokaha.
Ia tom•anio a•dokni Chief Minister, jinmana aganprakangengon, Meghalaya Day-ni mongsonggipa manianiko Baghmara-o ong•ataniara a•dokni darang biapkon nichanggaljana gita sorkarini miksonge kam ka•aniko mesokani ong•a ine parakataha. South Garo Hills a•jako indita bilsirangna nichanggalaha indiba da•o ia jolrangoba dingtanganiko ra•bana gita sorkari, rakbee kamrangko ka•engaha ineba ua aganaha.
Ia salara a•dokni manderangna namen gamchatbegipa sal ong•a ine janapangengon, Captain Williamson A Sangma sagini dilanichi, a•dokni pagitchamrang, ku•cholsan ong•e, an•chi pari nikani grisa a•dokko man•e on•ahani gimin ia salko Captain Sangma sagini a•jao manianiara namen krabegipa ong•aha ine Chief Minister aganaha.
Batanggimin bilsi gittamni gisepo a•dokni dal•roroani 10 percent-mangni gita ong•aha aro ian Meghalaya a•dokko India a•songo ta•rakbatsrange dal•roroenggipa a•dokrangoni damsa ong•ataha ineba Sangma aganaha.
Gong crore 140 ong•gipa Baghmara Water Supply Project-ni gnigipa bakna salsa skangan chamatmanaha ine janapatengon, South Garo Hills a•jao rama jal•langrangko aro sanna banani kamrangko nambatatna gita sorkari, mongsonggipa ong•e kamko ka•gen ine Chief Minister ku•rachakaniko on•angaha.
Baghmara Civil Hospital-na kam ka•giparangko on•dapna, rongtal an•talaniko rakkina aro hospital-o nangdapenggipa dingtang dingtang bosturangko sokate on•na gitaba Chief Minister ku•rachakangaha.
Meghalaya a•dokko man•na krengdilanggipa a•dokni gitcham dilgiparangna mande ra•pilskaaniko on•angengon, chengonin Meghalaya a•dokni manderang ku•cholsan ong•e kam ka•giparang ong•a ine ia apsan gunkon ja•rikangkuchina gita Chief Minister, a•dokni dingtang dingtang jatrangko didiangaha.
Ia salni bako a•songni Prime Minister Narendra Modi-ba a•dokni manderangna namgipa skaniko on•ataha ine jinmana parakatengon, uni seatgipa chittio Prime Minister, PA Sangma sagini kamrangko aro uni Meghalaya aro a•songna on•gilanirangko janapataha ine Chief Minister aganaha.
Ia tom•anio a•dokni Deputy Chief Minister Prestone Tynsong-ba jinmana aganprakengon, ia manianiko namen gisik ra•beani sal ine janapatenba, Baghmara-o ian skanggipa changna a•dokni dal•begipa program-ko ong•atani ong•enga ine parakataha.
South Garo Hills a•jako Meghalaya a•doko ja•manchakbatsrangenggipa a•jarangoni damsa ine janapatengon, a•dokni pilak biaprangon, mongsongbate rama jal•langrangko nambate tarina sorkari kam ka•enga ine Tynsong aganenba, Shillong-Baghmara ramako tariani da•o 60 percent-ni gita matchotmanaha ine parakataha.
Ia manianio a•dokni Education Minister Lahkmen Rymbui-ba jinmana aganprakangengon, ia Meghalaya Day-ara, a•dokni songrebaaniko aro mikkangchiko nisamsoani somoi ong•enga ine aganaha. 2018 bilsi dipetan ia sorkari, a•dokni pilak biaprangon dingtanganiko ra•bana man•aha ineba Rymbui aganaha.
Ia tom•aniko a•bachengatanio, Shillong-ni Khmih Choir, State Anthem-ko ring•dilaha aro uni ja•man a•dokni dingtang dingtang jatrangba ring•anirangchi aro chrok mesaanirangchi ia manianiko mikkim gnangbatataha.
Na·simang iakoba nina man·gen:
Na·simang iakoba poraina man·gen: Tura-oba chang 54-gipa Meghalaya Day-ko mania
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
