Tura, Aug 6: South Garo Hills a·jani Chokpot Community Health Centre-o (CHC) doctorrang dongsimjani gimin ua jolo songdonggipa manderang bang·a neng·nikanirangko man·enga ine parakataha aro uandake ia obostani a·selo manderangni nangchongmotgipa sanna-banani cholko man·jaenga ine Chokpot Area Vigilance Committee iarangna bakbakan kamrangko ka·china sorkariko dabiaha.
CHC-o doctorrang dongjani a·selo sagipa manderang uamangni nanggitikani somoirango bang·a changrangon sanna-banani cholrangko man·jaha ine Committee-ni Co-chairman Chamujar Ch. Sangma kobor ra·timgiparangna parakataha.
“Ia obosta da·osan ong·aigipa ong·ja indiba ian sanna-bananirangko dakgiparangni changni chang bilgrianiko mesoka. Pil·nipil sedoani aro ku·aganani ja·manoba sorkari mamungko dakjaenga,” ine ua janapaha.
Iandake galchipako man·ani a·selo sorkarini on·gipa sanna-banani cholrangosan pangchake janggi tanggipa kangal-cholgrigipa manderang neng·nikaniko man·batenga ineba Sangma aganangaha.
Chokpot CHC-o ta·raken chu·onga gita doctorrangko rakkichina, kam ka·giparangni re·baani aro kam ka·anirangko nirokchina aro konta 24 emergency service-rangko on·china aro ong·gimin obostarangni bidingo manderangna aganchakaniko on·china ine committee-ni manderang sorkario dabiangaha.
Vigilang Committee ia ong·gimin obostako sanna-bananio neng·nikani baksana sagiparangna ande ra·aniko on·gijani ine janape, iarangko dal·e ra·china aro somoi gita kamrang ka·china a·dok sorkariko didiaha.
“Anga DMHO baksa tom·aniko dake iani gimin tale sandianiko dakgen. Chinga da·al DHS baksa grongaha, indiba ia obostani gimin agangrikaniko dakjaha, ong·jaode iana namataniko ra·bana man·gnokchim,” ine South Garo Hills a·jani Deputy Commissioner, Sumit Kumar Singh, Hub News-na aganaha.
Uandake maiba neng·nikani donggenchimode uona re·bae aganechina ineba ua South Garo Hills a·jao songdonggipa manderangna mol·molaniko on·e, ku·cholsan neng·nikaniko namatna cholrangko sandina man·gen ine DC manderangna u·iataha.
Na·simang iakoba nina man·gen:
Na·simang iakoba poraina man·gen: Assam a·doko doctor ine dakmikgipa sak-50 manderangko rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
