Williamnagar, Oct 8: Panchayat Advancement Index (PAI)-ni bidingo bang·bata songni nokni manderang aro mongsongbate Nokma-Sanirang ma·sisretokkengani gimin Budbar salo, Dadenggre C&RD Block-ni Block Development Officer (BDO) Saljagring G Momin, dingtang dingtang songni Nokmarang aro dingtang dingtang Village Employment Council (VEC)-ni president aro secretary-rangna, Dadenggre C&RD Block-ni Enterprise Facilitation Centre-o tom·aniko ong·atangenba, PAI-ni gimin agan-talatanirangko on·angaha.
Tom·aniko Dadenggre-ni Nokma Grenath Sangma dilangaha aro ia tom·anio dingtang dingtang a·kingni Nokmarang, VEC-ni dilgiparang aro songni nokni manderangba bak ra·angtokaha.
Ia tom·anio rimchaksoani kattarangko aganangengon, PAI-ni bidingo talate on·na ia tom·aniko ong·atahani gimin Dadenggre-ni Nokma, BDO Saljagring Momin-ko mittelpilangaha.
Panchayat Advancement Index-ni bidingo Nokmarangna aro VEC-ni dilgiparangna agan-talatanirangko on·angengon, ia songadam nokadamrango, namroro silroroani kamrangko maikai ka·enga uko nipilna gita ma·mong sorkarini ra·gatgipa survey ba am·sandianisan ong·aia ine Dadenggre BDO, iani bidingo ma·sisretjachina Nokmarangko aro VEC-ni dilgiparangko didiangaha.
Ia PAI-ko dakani miksonganiara, songo noko mai kamrangko namdapatna nangenga aro maio namroro silroroataniko nangenga, uko ma·sie ra·enba dakchakanirangko on·na miksonganisa ong·a ineba Momin aganaha.
Momin-ni aganani gitade, ia PAI-o ‘Panchayat’ ingipa katta dongani giminsa Garo Hills-o Panchayati system-ko ra·gatna miksongenga ine bang·a manderangan ma·sisrettokenga.
Manderang ia ‘Panchayat’ ingipa kattako namnikjaenga ong·ode bimingko dingtangatchina gita C&RD department ba uandake nangchakegipa department-ko didina man·gen ine janapatengon, ia PAI-ko ka·anichi maming dakeba A·chik a·songo ja·rikbaenggipa niam retirangna nangchakeaniko ra·bana man·jawa ine BDO ku·rachakaniko on·angaha.
BDO-ni talate on·angani ja·man adita sak Nokmarang, ia PAI-ni bidingo talbate sing·sandianirangko dakangkuaha aro ua uamangna agan-talatanirangko on·angaha. BDO-ni talate on·ani ja·manba mitam Nokmarang aro VEC-rang, PAI-ko ra·chakna man·teljahani gimin ja·mano ‘Panchayat’ ingipa kattako bodolchina sorkariko didina gita dingtangmancha sub-committee-ko songe donangaha.
Ia tom·anio, MGNREGA-ni Additional Program Officer (APO) Ruchika Marak-ba jinmana aganprakengon, eKYC-ni bidingo agan-talatanirangko on·angskaaha.
Ia tom·anio Nokmarang, GHADC-ni ning·o donggipa a·kingrangko digital-chi wa·reng salna miksonge ia 2025 bilsini June 20 tariko a·bachengatgipa ‘Mission Aman A·song’-ni giminba chanchirimangaha.
Tom·a matchotani ja·man, Dadenggre-ni BDO Saljagring G Momin, Hub News baksa agangrikengon, Nokmarangni gisepo PAI-ni gimin ma·sisrettokengani giminsa talataniko on·na gita ia tom·aniko ong·ataha ine parakataha.
Bang·bata manderangan PAI-ko ra·chaktokengoba mitam Nokmarang, iako ra·chakna man·tokkujaenga ineba Momin aganaha.
Na·simang iakoba nina man·gen:
Na·simang iakoba poraina man·gen: Garirangko namedake chalaiatna kam ka·anina Hid Foundation Shillong Ri Bhoi a·jani police-rangko mitelata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
