Shillong, Jylliew 25: Ka All Meghalaya Contractors and Suppliers Association (AMCSA) ka la dawa ia ka Sorkar Jylla ban weng noh ia ka Tender kaba la don lypa na ka bynta ka State Animal Husbandry Veterinary Hospital ha Upper Shillong bad ban khot Tender biang daka ba phiah ia ki song (split package system), haba ong ba ka rukom khot Open Tender ka khanglad ia ki contractor trai Jylla ban ïashim bynta.

Ha ka dorkhas sha u Myntri ka tnat Animal Husbandry Veterinary u Bah Sanbor Shullai, ka AMCSA ka la ong ba ka pdiang sngewbha ïa ka jingthmu jong ka Sorkar ban pynkhlain ïa ki lad jingsumar mrad, da kaba khot ïa kane ka projek kaba kongsan na ka bynta ki nongrep ba ri jingri ha kylleng ka jylla Meghalaya.

Hynrei ka Association ka la kynthoh ba ka rukom khot Tender mynta ka khanglad shibun ïa ka jingïashim bynta jong ki contractor trai Jylla.

“Ka jingpynïasoh lang jong kawei ka Tender ka pynduh noh ïa ka jingbun ki contractor trai Jylla kiba tbit kiba don ïa ka jingshemphang bad ka jinglah kaba donkam ban pyntreikam ïa ki bynta bapher bapher jong ka projek, hynrei kim lah ban pynbiang ïa ki jingdonkam lada pynlong beit tang kawei ka Tender kata ruh kaba heh” ula ong.

U president ka AMCSA u Bah Precious Sumer u la kyntu ia ka tnat ban weng noh ia ka Tender kaba mynta ban pynthikna ia ka jingiakhun ban ioh iaka kam ka long kaba hok bad kaba khuid bad ban bishar bniah khnang ban lah ban phiah iaka Project.

Ka Association ka la ai jingmut ban phiah iaka Tender haki bynta jong ka Project kum ka jingpynroi ia ka jaka bad tih khyndew, ki kynroh, ki surok, ki nala um, bad ki iing sah jong ki nongtrei.

Kala pynskhem ba ka rukom phiah ïa ki kam kan kyntiew ïa ka jingïakhun ban ioh iaki project haka rukom kaba shai katba ka pynlah ban pyntreikam ha kajuh ka por ïa ki bynta ba bun jait jong ka Project.

“Ki contractor trai Jylla ki la noh synniang sha ka roi ka par jong ka Jylla bad ki don ïa ka jinglah bad ka jingkitkhlieh kaba donkam ban pyntreikam ïa kum kine ki kam, tangba la ailad ïa ki ban ïoh ïa ki lad kiba ïaryngkat” ula ong.

Ka AMCSA ka la bynrap ba ka jingïashim bynta jong kiba bun kan pynmih ïa ki kam ha ka thaiñ, kan pynkhlain ïa ka kam tei jingtei jong ka Jylla, bad kan ïarap ban bat ïa ki jingmyntoi ha ka ioh ka kot hapoh ka Meghalaya.

Ka la kyrpad ïa u Myntri ban pynsangeh noh ïa ka rukom ai tender kaba mynta bad ban khot biang ïa ki jingtyrwa lyngba ka rukom phiah ïa ki kam khamtam eh na ka bynta ka jingpynroi ïa ka jaka bad ki kam kiba rit.

“Ngi shaniah ba ka tnat kan pyrkhat bha ïa na ka bynta ka jingmyntoi jong ka roi ka par kaba kynthup lang bad ka jingbha jingmiat jong ki nongshong shnong jong ka Meghalaya,” ong ka Association.