Imphal, Jylliew 26: Ka Kuki-Zo Council ( KZC) ka la kubur ba ki dkhot jong ka jaidbynriew Kuki-Zo ki donkti ha kaba pyniap ïa ki 6 ngut ki Naga ba shah rahbor ha Manipur, da kaba batai ïa kane ka jingjia kum ka jingbakla kaba khraw kaba la leh “namar ka jingsngew”.

Haba kren bad ki lad pathai khubor ha Churachandpur ha ka sngi Palei, u chairman ka KZC u Henlianthang Thanglet u la pan map paidbah halor kitei ki jingshah pyniap bad u la khot ruh ia ka jingtohkit kaba khuid bad kaba khlem shah liang.

“Nga mynjur ba ki Kuki-Zo ki la leh ia ka jingbakla kaba khraw da kaba pyniap ia ki 6 ngut ki briew kiba dei na ka jaitbynriew Naga.Nga pynrem jur ia kane.Nga sngewsih shibun bad nga panmap na ka bynta ki briew jong nga,” la ong u Thanglet.

Hynrei u la pynskhem ba ïa ki jingpynïap briew ym shym la ai bor ne mynjur da kino kino ki nongïalam saiñ hima sima ne ki nongïalam jong ka imlang sahlang na ka jaitbynriew Kuki-Zo.

Ka KZC ka la dawa ruh ban tohkit bniah ia baroh ki jingjia shah thombor ba dang shen, kynthup ia ka jingshah pyniap jong ki 6 ngut ki nongshah rahbor ki Naga, ka jingiap jong ki lai ngut ki Pastor Kuki-Zo bad 14 ngut ki riew paidbah Kuki, bad ki jingshah thombor ha ki shnong Kuki.

Kane ka jingpdiang ka long hapdeng ka jingïakynad kaba nang jur hapdeng ki bynta jong ki jaitbynriew Naga bad Kuki-Zo hadien ki jingshah thombor kiba la sdang ha u bnai Jymmang.

Ki 6 ngut ki Naga kiba la shah pyniap ki dei napdeng ki 20 ngut ki riew paidbah kiba la shah rahbor ha Kangpokpi district ha ka 13 tarik Jymmang, ha kajuh ka sngi lai ngut ki nongialam ba pawkhmat jong ka Balang Thadou bad u nongniah kali jong ki, ki la shah pyniap ha ka jingshah thombor ha ka por ba ki dang wan phai na ka jingialang iasuk hapdeng ki Balang ha Churachandpur.

Kiba la shah pynïap ha katei ka jingshah ambush ki kynthup ïa u Rev. Dr. Vumthang Sitlhou, president ka Thadou Baptist Association, u Rev. Kaigoulun Lhouvum bad u Pastor Paogoulen Sitlhou.Ka jingshah pyniap ka la pynkyndit ia baroh ar tylli ki jaitbynriew, khamtam namar ba u Rev. Sitlhou u la don bynta shitrhem ha ki jingthmu ban iasuk hapdeng ki Kuki bad ki Naga.

Ym don kano kano ka kynhun kaba la kam ia ka jingkitkhlieh halor katei ka jingshah thombor jong ki nongialam balang, bad ka jingmaham kaba don sawdong jong kitei ki jingshah pyniap, ka dang sahkut haduh mynta. Ka National Investigation Agency (NIA) ka la shimti ia ka jingtohkit ha ka 8 tarik u Jylliew, da kaba kdew ia ka jingkhia jong ka kam runar bad ki jingktah kiba kham heh jong ka.

Ka Kuki-Zo Council ka la kynnoh ba ia kane ka jingambush la leh da ka Zeliangrong United Front (Kamson) ha ryngkat ka jingiatreilang bad ki kynhun kaikhlaw, katba ka Kuki Organisation for Human Rights Trust ka la kynnoh ruh ba ka donkti ka NSCN-IM.Baroh ar kynhun ki la kyntait ia katei ka jingkynnoh.

Ha kajuh ka por, u Deputy Chief Minister ka Manipur u Dr. Losii Dikho u la kynnoh ba ki dkhot jong ka Kuki National Front-Presidential (KNF-P) ki ba don kti na lyndet ban rahbor bad pyniap ia kitei ki 6 ngut ki Naga.

Ia ki met iap jong ki 6 ngut ki nongshah rahbor la tam na kawei ka jaka kaba don khlaw hajan ka shnong Kharam Vaiphei ha ka Kangpokpi District ha ka 10 tarik Jylliew. Ka United Naga Council (UNC) ka la kam ba kitei ki met iap ki dei kiba la shah ot lyngkhot lyngkhai bad ka la kyntait ban pdiang ia ki tad haduh ban da pyndep ia ki jingdawa jong ka, kynthup ia ka jingpyndam noh ia ka jingiateh Suspension of Operations (SoO) bad ki kynhun kaikhlaw Kuki.

Kane ki jingshah pyniap ka la pynmih ia ki jingiakhih ha kylleng ki jaka ba shong ki Naga, ha kaba ka All Naga Students’ Association, Manipur (ANSAM) ka la ialam ia ka jingialang iasuk ha Imphal ha ka 20 tarik Jylliew ban dawa ia ka hok, ka jingtohkit jong ka NIA bad ka jingleh pyrshah ia kiba donkti.

U Thanglet u la ong ba ïa ka jingïakynad la pynmih da ka jingïaid lynti kaba la sdang na ka jingshah pynïap jong ki arngut ki Kuki hadien ka jingïakynad na ka daw jong ka jingbuaid ha ka District Ukhrul, bud sa ka jingshah thombor ha ki nongïalam Balang bad hadien kata ka jingshah pynïap jong ki Naga kiba la shah rahbor.

Wat la ka jingpanmap jong ka Kuki-Zo Council ka pyni ia ka jingpdiang ia ka jingkitkhlieh, hynrei ki jingjia kiba iadei bad ka jingshah pyniap jong ki lai ngut ki pastor ki dang sahkut ha ka jingmaïan, ha kaba ki nongtohkit kim pat lah ban pynthikna mano ba la pynlong ia katei ka jingshah thombor bad ka ambush kaba shyrkhei kaba la pynmih ia ka jingshah thombor kaba khatduh eh.

Ka NIA ka dang tohkit mynta ia baroh ar ka jingshah thombor ha ka 13 tarik u Jymmang ia ki nongialam balang bad ka jingshah rahbor bad pyniap ia ki 6 ngut ki Naga.